ბრიტანეთის დაზვერვის დღევანდელ ანგარიშში საუბარია იმაზე, რომ რუსეთის ფედერაციის რამდენიმე რეგიონმა 9 მაისს აღლუმის ჩატარებაზე უარი განაცხადა, ზოგი კი აღლუმს ტრადიციულად გამართავს.
რუსეთის ფედერაციის იმ რეგიონების ლიდერებმა, რომლებიც უკრაინას ესაზღვრებიან, ისევე როგორც ოკუპირებული ყირიმის ლიდერებმა განაცხადეს, რომ აუქმებენ 9 მაისის ტრადიციულ, პომპეზურ სამხედრო აღლუმს.
„როგორც ოფიციალურმა პირებმა განაცხადეს, ღონისძიება, უპირველეს ყოვლისა, საზღვრის მახლობლად უსაფრთხოების პრობლემების გამო გაუქმდა“, – წერს ბრიტანეთის დაზვერვა დღევანდელ ანგარიშში.
ამავდროულად, როგორც დაზვერვის ანალიტიკოსები აღნიშნავენ, უკრაინიდან მოშორებით მდებარე რუსეთის სხვა ქალაქები ადასტურებენ, რომ ტრადიციულად გამართავენ გამარჯვების დღის აღსანიშნავ აღლუმს.
რადგან „სპეციალურ სამხედრო ოპერაციას“ რუსეთის პრეზიდენტი, ვლადიმერ პუტინი, მეორე მსოფლიო ომში საბჭოთა გამოცდილების სულისკვეთებით აყალიბებს, „ეს გზავნილი ზრდის რისკებს უფრო მეტი შფოთვა გამოიწვიოს იმ რუსებში, რომლებმაც იციან უკრაინაში წარმოებული კამპანიის ცუდ ორგანიზებასა და წარუმატებლობაზე“, – აცხადებენ ანალიტიკოსები.
„დაღუპული წინა თაობებისთვის პატივის მიგება შეიძლება ადვილად გადაიქცეს ბოლოდროინდელი დანაკარგების იმ მასშტაბის გამოვლენად, რომლის დაფარვასაც კრემლი ასე ცდილობს“, – ასკვნის ბრიტანეთის დაზვერვა.
9 მაისი – გამარჯვების დღეს რუსეთში, მოსკოვში, წითელ მოედანზე ტრადიციულად ფართომასშტაბიანი აღლუმით აღინიშნება, სადაც ქვეყანა საკუთარი სამხედრო „სიძლიერის“ დემონსტრირებას ახდენს. უკრაინასთან ომის წამოწყებამდე ვლადიმერ პუტინი ამ დღის აღსანიშნავ ღონისძიებაზე იწვევდა ლიდერებს მთელი მსოფლიოდან. ყირიმის ოკუპაციის შემდეგ კი სულ უფრო ნაკლები პოლიტიკოსი თანხმდებოდა პუტინის მიწვევას.
გასულ წელს ამ ღონისძიებაზე დასასწრებად უცხოელი პოლიტიკოები მოსკოვში თითქმის აღარ ჩასულან.
