ბათუმში ასამდე სტომატოლოგიურ კაბინეტში სამუშაო ინსტრუმენტების სტერილობის შემოწმების შედეგად დარღვევები არ გამოვლინდა. ინფორმაციას ამის შესახებ ბათუმის მუნიციპალური ინსპექცია ავრცელებს.
უწყების სანიტარული ზედამხედველობის განყოფილებამ ბათუმში 94 სტომატოლოგიური კაბინეტის გეგმური მონიტორინგი ჩაატარა. მუნიციპალური ინსპექცია დაწესებულებებს გეგმურად, წელიწადში 2-ჯერ ამოწმებს.
მათივე ცნობით, მერიასთან გაფორმებული ხელშეკრულების ფარგლებში „ლაბორატორიული კვლევითი ცენტრის“ მეშვეობით ინსტრუმენტების სტერილობაზე 106 ნიმუში იქნა აღებული – არც ერთ შემთხვევაზე ნორმების დარღვევა არ დაფიქსირებულა.
არასტერილური ინსტრუმენტების გამოყენება ერთჯერადად 100-ლარიან ჯარიმას ითვალისწინებს.
არასტერილური სტომატოლოგიური ინსტრუმენტების გამოყენება შეიძლება გახდეს ბევრი დაავადების, მათ შორის, შიდსითა და ჰეპატიტით დაინფიცირების რისკფაქტორი.
მუნიციპალური ინსპექციის მონიტორინგის სამსახურში ამბობენ, რომ სილამაზის სალონების სანიტარულ ნორმებზე შემოწმება წელს არ ჩატარებულა. გასული წლის მონაცემებით, ერთდროულად სანიტარული ნორმებისა და კოვიდრეგულაციების დაცვის მიზნით ბათუმში 233 სილამაზის სალონი შემოწმდა. მათგან ნორმების დარღვევასთან დაკავშირებით 11 სამართალდარღვევის ოქმი შედგა.
