Batumelebi | ბათუმის მოუწესრიგებელი ბულვარი | ფოტო ბათუმის მოუწესრიგებელი ბულვარი | ფოტო – Batumelebi
ნეტგაზეთი • RU

ბათუმის მოუწესრიგებელი ბულვარი | ფოტო

ბათუმის ბულვარში საკურორტო სეზონის მოახლოება უკვე იგრძნობა, ხალხმრავლობაა განსაკუთრებით დღის მეორე ნახევრიდან ღამის 12 საათამდე, თუმცა აქ ერთხელ გასეირნებითაც მიხვდებით, რომ ბულვარი სეზონისთვის ჯერ მზად არ არის.

ძალიან ბევრ ადგილზე ინფრასტრუქტურა დაზიანებული, მცენარეები კი მოუვლელია. ბევრგან დაგხვდებათ ასევე დასაწყობებული სამშენებლო მასალები, ზოგან კი სარემონტო პროცესი მიმდინარეობს. ამ დრომდე გამწვანებულ ბილიკზეა დაყრილი რკინის კონსტრუქციები, რომლებიც რამდენიმე კვირის წინ შტორმმა დააზიანა.

ბათუმის ბულვარი.

ბათუმის ბულვარი.

ბათუმის ბულვარი.

ბულვარის ადმინისტრაციაში გვითხრეს, რომ რკინის კონსტრუქციების გატანა ახალი ბულვარის ტერიტორიიდან დღეს, 26 აპრილს,  დაიწყეს და ამ პროცესის ამსახველი ფოტოებიც მოგვაწოდეს. გვითხრეს ისიც, რომ ბულვარის ადმინისტრაციას წლების განმავლობაში მოზრდილი მასშტაბის საწყობი არ ჰქონდა, ამიტომაც სხვადასხვა მასალა ხშირად ამფითეატრის მიმდებარედ იყო დასაწყობებული:

„მერიამ გამონახა ჩვენთვის საწყობი ახალი ბულვარის ტერიტორიაზე და დღეიდან ეს პრობლემაც მოგვეხსნება.“

ბულვარის მთელ პერიმეტრზე დიდი ზომის ფილების უმეტესობა დაზიანებული, დაბზარული ან სულ დამტვრეულია. მათგან ბევრი, რომლებიც თითქოს მოწესრიგებულად გამოიყურება, მოშლილია და ყანყალებს, რაც განსაკუთრებით წვიმიან ამინდშია არაკომფორტული, ასევე წვიმის შემდეგაც, ვიდრე ფილების ქვეშ დაგროვილი წყალი კარგად არ გაშრება.

ამ მხრივ განსაკუთრებით რთული ვითარებაა საზაფხულო თეატრის ირგვლივ, შენობის ოთხივე მხარეს, მათ შორის, შესასვლელის მხრიდან, ფილები მნიშვნელოვნად დაზიანებულია.

საზაფხულო თეატრი

ბათუმის ბულვარი – დაზიანებული ფილები საზაფხულო თეატრის მარცხნივ

ბათუმის ბულვარი – დაზიანებული ფილები საზაფხულო თეატრის მარჯვნივ

„ფილების პრობლემა მართლაც აქტუალურია, ეს ჩვენც გვაწუხებს. თუმცა ამ ეტაპზე მის სრულ რეაბილიტაციას ვერ დავგეგმავთ, რადგან სეზონი მოახლოებულია და დამსვენებელს დისკომფორტს ვერ შევუქმნით. გარდა ამისა, სრულ რეაბილიტაციას დიდი ბიუჯეტი სჭირდება, ჩვენს კონტრაქტორებს კი მომსახურების ვადა ამოეწურათ. ამიტომ ჩვენი ძალებით ვცდილობთ დროებით შევაკეთოთ დაზიანებული ნაწილი 150 000 ლარის ფარგლებში, სამუშაოების ნაწილი დასრულებულია. სრულად 15 მაისისთვის უნდა დასრულდეს“, – ამბობს ბულვარის დირექტორის მოვალეობის შემსრულებელი სოფო ლაზიშვილი.

ბულვარის ინვენტარს მოქალაქეები ხშირად ისე გადაადგილებენ, როგორც უნდათ. ნარჩენების ადგილზე დატოვებასაც არ ერიდებიან. როგორც ჩანს, ამ პროცესს არავინ აკონტროლებს, აქ იშვიათად შეხვდებით დაცვის პოლიციელს. არის შემთხვევებიც, როცა ისინი კონკრეტულ დარღვევებზე, როგორიც არის, მაგალითად, ე.წ. სქროლებით სასეირნო ბილიკზე გადასვლა, მცენარეების დაზიანება და ასე შემდეგ, არ/ვერ რეაგირებენ.

ბულვარის ადმინისტრაციაში განმარტეს, რომ დარღვევა ორმხრივია, როგორც „სქროლის“ მომხმარებლები, ასევე ქვეითებიც არღვევენ წესებს და ველობილიკზე გადადიან: „ვერაფერს გავხდით, დაცვის წარმომადგენელს მათი დაჯარიმების უფლება არ აქვს.“

ბათუმის ბულვარი.

ბათუმის ბულვარი.დაზიანებული სკამი ბულვარში – ბულვარის დირექტორის მ/შ – სოფო ლაზიშვილის განმარტებით, ამ ბეტონის სკამებზე ჩამონტაჟებულ ჰოლოგრამებს ხშირად აზიანებენ, ბულვარს მათი შეკვეთა ყოველ წელს უწევს.

ადგილი, სადაც „პიერ-ბათუმი“ იყო, სამშენებლო ნარჩენებისგან გაწმინდეს. ჩაუხერგავი ღია სივრცე გამვლელებსაც მოსწონთ, თუმცა ადგილი ბოლომდე მოწესრიგებული არ არის. მოუწესრიგებელია მიმდებარედ არსებული კლუბის შესასვლელიც. ბულვარის ადმინისტრაციის ინფორმაციით, უახლოეს დღეებში უნდა დაიწყოს „პლაჟის მოსწორების სამუშაოებიც.“

ბათუმის ბულვარი. ამ ადგილზე „პიერ-ბათუმი“ დაანგრიეს

ჭუჭყიანი და მოუწესრიგებელია ე.წ. ქორწინების სახლი ბულვარის მთავარ შესასვლელში. შენობის შესასვლელთან  შადრევნის ავზში არსებული წყალი კი დაბინძურებული და დაჭაობებულია. შენობის უკანა მხარეს შუშის ნაწილზე, არც მეტი არც ნაკლები, პოლიეთილენის პარკია აფარებული. სოფო ლაზიშვილის ინფორმაციით, ეს შენობაც 14 მაისამდე უნდა მოწესრიგდეს: „მის მფლობელთან, იუსტიციის სახლთან, ამაზე გვქონდა მოლაპარაკებები.“

ბათუმის ბულვარი – ქორწინების სახლი ბათუმის ბულვარის მთავარ შესასვლელთან

ბათუმის გენგეგმის მიხედვით, რომელიც ჯერ დამტკიცებული არ არის, სამომავლოდ, ე.წ. ქორწინების სახლი ბულვარის შესასვლელში დემონტაჟს ექვემდებარება.

ბათუმის ბულვარი. ქორწინების სახლის უკანა მხარე პოლიეთილენის პარკით არის დაფარული

ბათუმის ბულვარი. ქორწინების სახლის შესასვლელთან აუზში წყალი დაბინძურებული და დაჭაობებულია

ბათუმის ბულვარი. აქ წერია, რომ დურბინდის ასამუშავებლად სპეციალურ აპარატში რკინის ლარი უნდა მოათავსოთ, სხვა ინსტრუქცია არ არსებობს. გაუგებარია რამდენ წუთს მუშაობს ის. გარდა ამისა, ორი დურბინდიდან ერთი ისეა გაჭედილი, რომ მისი მობრუნება ჭირს, ხედავ მხოლოდ ერთ კადრს და ითიშება, როგორც კი მის მიბრუნებას შეეცდები

მიმდინარე სამუშაოები ბათუმის ბულვარში

ბათუმის ბულვარი.

ნეტგაზეთის მასალების სხვა გამოცემებში გადაბეჭდვის წესი
ავტორი