ჯგუფურად ჩადენილი ფიზიკური ძალადობის ფაქტზე პროკურატურამ 5 პირი დააკავა. მათ გამოძიება ქობულეთში, „კონსერვატიული მოძრაობის“ ოფისთან, 22 მარტის აქციაზე ძალადობის ჩადენას ედავება.
22 მარტს ქობულეთში პრორუსული „ალტ-ინფოს“ პარტიის „კონსერვატიული მოძრაობის“ ოფისის წინ, საპროტესტო აქციაზე შეკრებილებმა ოფისის დახურვა მოითხოვეს. აქციაზე რამდენიმე პირი ადმინისტრაციული წესით დააკავეს. ამჯერად კი, 5 პირის სისხლისსამართლებრივი პასუხისმგებლობა გამოკვეთა პროკურატურამ.
პროკურატურის ვერსიით, ბრალდებულმა ჯგუფურად ფიზიკური შეურაცხყოფა მიაყენეს 3 პირს.
„სამართალდამცველებმა ბრალდებულები სასამართლოს განჩინების საფუძველზე, 29 მარტს დააკავეს… პროკურატურა ბრალდებულებისთვის აღკვეთის ღონისძიების სახით, პატიმრობის გამოყენების მოთხოვნით, ბათუმის საქალაქო სასამართლოს კანონით დადგენილ ვადაში მიმართავს,“ – აღნიშნულია მთავარი პროკურატურის მიერ გავრცელებულ ინფორმაციაში.
ბრალის დადასტურების შემთხვევაში, ბრალდებულებს ელით დაჯარიმება ან საზოგადოებისათვის სასარგებლო შრომა, ვადით 190-დან 240 საათამდე, ანდა თავისუფლების აღკვეთით ვადით 2 წლამდე.
„დაკავებული იყო 12 პირი ადმინისტრაციული წესით და დააჯარიმეს 2-2 ათასი ლარით. აქციის მონაწილე არ ყოფილა ვინმე დაკავებული,“ – გვითხრა ლაშა კომახიძემ, რომელიც ქობულეთის საკრებულოს წევრია ენმ-დან.
ეს არაა პირველი შემთხვევა, როცა „ალტ-ინფოსთან“ დაკავშირებულ პირებს გამოძიება ჯგუფურ ძალადობას ედავება. 2021 წლის 5 ივლისის აქციის შემდეგ, ჟურნალისტებზე ძალადობის ბრალდებით 27 პირი დააკავეს. სახალხო დამცველის და უფლებადამცველების შეფასებით, იკვეთებიან ძალადობის ორგანიზებაში ჩართული პირებიც, ვისი პასუხისმგებლობის საკითხიც პროკურატურას არ დაუსვამს.
———–
ტელევიზია „ალტ-ინფოს“ წარმომადგენლებმა 2021 წლის ნოემბერში დააფუძნეს პრორუსული პარტია „კონსერვატიული მოძრაობა“.
„კონსერვატიული მოძრაობის“ პარტიის ოფისების გახსნა მოქალაქეებმა არაერთ ქალაქში სხვადასხვა ფორმით გააპროტესტეს, ზოგიერთ შემთხვევაში კი „კონსერვატიულ მოძრაობას“ საოფისე ფართობი დაატოვებინეს. ასე მოხდა მესტიაში, ხულოსა და შუახევში.
ქობულეთში „კონსერვატიული მოძრაობის“ ოფისში, „ალტ-ინფოს“ ინფორმაციით, მუშაობას განაგრძობენ და მალე ახალ ოფისებსაც გახსნიან.
