„არ გაყიდოთ თქვენი ხმები“ – მიხეილ სააკაშვილი ციხიდან ფეისბუქის საშუალებით მიმართავს ბათუმელ ამომრჩეველს, რომელმაც 2 აპრილს მე-4 მაჟორიტარულ ოლქში არჩევანი უნდა გააკეთოს. ამ არჩევნებზე იქნება დამოკიდებული, ბათუმის საკრებულო ოპოზიციური იქნება თუ არა.
მიხეილ სააკაშვილი ამომრჩეველს ოპოზოციური ერთობის კანდიდატის – მათე ფუტკარაძის მხარდაჭერისკენ მოუწოდებს.
2 აპრილს ბათუმში შუალედური არჩევნებია.
ბათუმის საკრებულოს წევრს ამჯერად მხოლოდ ბათუმის №4 მაჟორიტარულ ოლქში აირჩევენ, რადგან გასული წლის ოქტომბერში ამ ოლქში არჩეული ნუგზარ ფუტკარაძე 2021 წლის 18 ნოემბერს გარდაიცვალა. 24 ნოემბერს კი „ერთიანმა ნაციონალურმა მოძრაობამ“ გაავრცელა აუდიოჩანაწერი, რაც, პარტიის მტკიცებით, ადასტურებს იმას, რომ ნუგზარ ფუტკარაძის მოსყიდვას ცდილობდნენ 100 ათასი დოლარის სანაცვლოდ. თანხმობის შემთხვევაში ოპოზიცია უმრავლესობას საკრებულოში დაკარგავდა.
მიუხედავად იმისა, რომ არჩევნები 2021 წლის ოქტომბერში ჩატარდა, ამ დრომდე ბათუმში საკრებულო არ მუშაობს – საკრებულო ვერ ირჩევს თავმჯდომარეს და სხვა თანამდებობის პირებს. საკრებულოში ძალთა ბალანსი ახლა ასეა: 17 – 17 და ასეა მას შემდეგ, როცა გახარიას პარტიიდან საკრებულოში შესულმა წევრმა ირაკლი თავდგირიძემ კი თქვა, რომ ის „ნაციონალურ მოძრაობას“ მხარს არ დაუჭერს და დამოუკიდებელი დეპუტატი გახდა.
„ნაციონალურმა მოძრაობამ“ ბათუმის №4 მაჟორიტარულ ოლქში შუალედურ არჩევნებზე ბათუმის საკრებულოს წევრობის კანდიდატად ნუგზარ ფუტკარაძის შვილი, მათე ფუტკარაძე. მისი კონკურენტი „ქართული ოცნებიდან“ რამაზ ჯინჭარაძეა.
