დღეს, 15 მარტს, ცნობილი გახდა, რომ დიდი ბრიტანეთი ახალ სანქციებს აწესებს რუსეთის უკრაინაზე თავდასხმის საპასუხოდ.
ახალი სანქციების თანახმად რუსეთის სამთავრობო და რეგიონული ხელისუფლების 370-ზე მეტ წარმომადგენელს, პარლამენტარებს, ბიზნესმენებსა და მათი ოჯახების წევრებს, ეკრძალებათ გაერთიანებული სამეფოს ტერიტორიაზე შესვლა, მათი აქტივები კი დიდ ბრიტანეთში, აღმოჩენის შემთხვევაში, გაიყინება.
სიაში არიან: პრემიერ-მინისტრი მიხაილ მიშუსტინი, უშიშროების საბჭოს თავმჯდომარის მოადგილე დიმიტრი მედვედევი, თავდაცვის მინისტრი სერგეი შოიგუ, ეკონომიკის მინისტრი მაქსიმ რეშეტნიკოვი და ა.შ.
ასევე, სანქციები დაუწესდა რუსეთის საგარეო საქმეთა სამინისტროს ოფიციალურ წარმომადგენელს მარია ზახაროვას, რუსეთის პრეზიდენტის პრესმდივანს დიმიტრი პესკოვს, მის შვილებსა და ცოლს და ჟურნალისტ ვლადიმერ სალავიოვს.
გარდა ამისა, ბრიტანეთის ხელისუფლებამ სანქციები დაუწესა სადაზღვევო კომპანია Sogaz-ს, ინტერნეტკვლევის სააგენტოს, Geopolitika.ru ვებსაიტს, რუსეთის მეცნიერებათა აკადემიის აღმოსავლეთმცოდნეობის ინსტიტუტის ჟურნალს New Eastern Outlook-სა და პორტალ Oriental Review-ს. ამ კომპანიების აქტივები დიდ ბრიტანეთში გაიყინება.
