Batumelebi | გიორგი ერმაკოვი ბათუმში ახალი მეჩეთის აშენებაზე გიორგი ერმაკოვი ბათუმში ახალი მეჩეთის აშენებაზე – Batumelebi
RU | GE  

გიორგი ერმაკოვი ბათუმში ახალი მეჩეთის აშენებაზე

ბათუმის მერი, გიორგი ერმაკოვი, ეხმაურება წერილს, რომლითაც საინიციატივო ჯგუფი  ბათუმში ახალი მეჩეთის აშენებას მოითხოვს.

„ბოლო პერიოდში საზოგადოების მაღალი ინტერესის საგანს წარმოადგენს ბათუმში ახალი მეჩეთის აშენების საკითხი და მის გარშემო განვითარებული მოვლენები. ჩვენთან შემოვიდა საინიციატივო ჯგუფის წერილი ახალი მეჩეთის აშენების მოთხოვნით, რომელსაც დართული აქვს 12 000-მდე ხელმოწერა.
ჩვენი ვალდებულებაა, მიღებული გადაწყვეტილება იყოს მაქსიმალურად სამართლიანი და ადეკვატურად ასახავდეს საზოგადოებრივ ინტერესს.
საკითხის შესწავლის პროცესში ჩვენ გვექნება კონსულტაციები ავტონომიის ხელისუფლებასთან, ადგილობრივ საზოგადოებრივ ჯგუფებთან და ორგანიზაციებთან, ასევე, რელიგიის საკითხთა სახელმწიფო სააგენტოსთან.
მხოლოდ საკითხის ყოველმხრივი შესწავლის შემდეგ, გონივრულ ვადებში, იქნება მიღებული გადაწყვეტილება, რომელიც ეცნობება როგორც საინიციატივო ჯგუფს, ასევე, ფართო საზოგადოებას,“ – განაცხადა გიორგი ერმაკოვმა ვიდეომიმართვაში, რომელიც დღეს ბათუმის მერიამ გაავრცელა.

„მუსლიმთა კავშირის“ თავმჯდომარემ ტარიელ ნაკაიძემ 2016 წლის რვა თებერვალს ახალი მეჩეთის მშენებლობისთვის ტერიტორიის გამოყოფის მოთხოვნით საქართველოსა და აჭარის მთავრობას, ქალაქის მერიასა და უმაღლეს საბჭოს ოფიციალურად მიმართა.  ტარიელ ნაკაიძემ განცხადება სახელმწიფო სტრუქტურებში, ორგანიზაცია „ბათუმში ახალი მეჩეთის მშენებლობის საინიციატივო ჯგუფის“ სახელით შეიტანა.

ბათუმში ახალი მეჩეთის მშენებლობის საინიციატივო ჯგუფის ორგანიზებით კი, 4 მარტს აჭარის მთავრობის შენობასთან გამაფრთხილებელი აქცია გაიმართა.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com