დღეს ბათუმის იუსტიციის სახლში 13-მა ეკომიგრანტმა ოჯახმა საცხოვრებელი ფართობები დაირეგისტრირა. მათ სახლები გაზრდილი თანადაფინანსებით შეიძინეს. „ეკომიგრანტი ოჯახების საცხოვრებლით უზრუნველყოფის“ პროგრამის ფარგლებში წელს საცხოვრებელ ფართობებს თანადაფინანსებით, ჯამში, 100 ეკომიგრანტი ოჯახი შეიძენს. პროგრამის ბიუჯეტი 3 000 000 ლარია.
„2016 წლიდან დღემდე პროგრამის ფარგლებში საცხოვრებელი 558-მა ოჯახმა შეიძინა. აღნიშნული პროგრამით საცხოვრებლის პრობლემა ათეული წლის წინ სტიქიის შედეგად დაზარალებულ არაერთ ოჯახს მოეხსნა. პროგრამა ვრცელდება აჭარაში მცხოვრებ ყველა ეკომიგრანტ ოჯახზე. წელს აჭარის მთავრობამ დაფინანსება გაზარდა როგორც ეკომიგრანტებისთვის, ისე ხანძრით დაზარალებული ოჯახების საცხოვრებლის შეძენის ან ადღგენა/რეაბილიტაციისათვის“, – განაცხადა აჭარის ჯანდაცვის მინისტრის პირველმა მოადგილემ, რამაზ ჯინჭარაძემ.
2022 წლიდან ფინანსური მხარდაჭერა ხანძრით დაზარალებული ოჯახების სახლების რეაბილიტაცია/მშენებლობისთვის 15 000 ლარის ნაცვლად გაიზარდა 20 000 ლარამდე, ხოლო ეკომიგრანტი ოჯახების ადგილმონაცვლეობისათვის 25 000 ლარის ნაცვლად, გაიცემა 30 000 ლარი.
მთავარი ფოტო: აჭარის ჯანდაცვის სამინისტრო
