იმის მიუხედავად, რომ ბათუმელებს არაერთი პრობლემა აქვთ, ხოლო საკრებულო გაჩერებულია, ბათუმის საკრებულოს „ოცნების“ წევრების ფეისბუქგვერდებს თუ გადახედავთ, იფიქრებთ, რომ ბათუმში ადამიანებს არ აწუხებთ, მაგალითად, სოციალური პრობლემები, სიღარიბე, უკანონო მშენებლობები, მათ შორის, ბულვარში, გაუმართავი შუქნიშნები, ან ქალაქის უბნები, სადაც ამ დრომდე კანალიზაციის სისტემა არ აქვთ, ქუჩები, უკვე ყოველ სეზონზე ერთხელ რომ თხრიან.
ბათუმის საკრებულოს წევრებს აქვთ ფეისბუქპოსტები ბათუმზეც, თუმცა ეს ის შემთხვევებია, როცა მერია ამზადებს ინფორმაციას, როგორ დაასუფთავეს, მოაწესრიგეს, მაგალითად, ახალი ბულვარი შტორმის შემდეგ, ხოლო საკრებულოს წევრები ერთმანეთის მიყოლებით ამ ფოტო, ან ვიდეო კოლაჟს აზიარებენ.
უმეტეს შემთხვევაში დეპუტატებს ერთმანეთის მსგავსი პოსტები აქვთ, როცა საქმე მერის მხარდაჭერას ეხება. ტროლების ქარხანა შესაძლოა გაგახსენოთ მომენტმაც, როცა ერთი და იგივე შინაარსის, ან ზოგჯერ ფორმის პოსტები მმართველი პარტიის სახეების მხარდაჭერას ეხება.
მაგალითად, ბათუმის საკრებულოს წევრის, ნატალია ზოიძის ერთ-ერთი ბოლო ფეისბუქპოსტი ეხება იმას, რომ „ყრუ-მუნჯი არის დისკრიმინაციული ტერმინი და ის ხელს უწყობს სტიგმაზე დაფუძნებული ცრუ წარმოდგენების განვითარებას“. დეპუტატი აქვე გმობს ძალადობას, თუმცა ტერმინზე აქცენტირებით მან თითქოს გვერდი აუარა „პოლიციელებისგან შშმ მოზარდზე ძალადობის საქმეს“.
იგივე მოწოდება ჰქონდა საკრებულოს წევრ ზურაბ ნაკაიძესაც. მან ამ გზით სცადა პრობლემის არიდება და თითქოს მტკივნეულ თემას გამოეხმაურა კიდეც, რამაც საზოგადოების პროტესტი გამოიწვია და რაც ხელისუფლების უმოქმედობას ეხება, როცა სამართალდამცველი დაცვის ნაცვლად ადამიანებზე ძალადობს.
ადამიანებზე ძალადობა არ აღმოჩნდა საკრებულოს „ოცნების“ სხვა წევრებისთვის ისეთივე მნიშვნელოვანი, როგორიც იყო თეა წულუკიანის და ელენე დარიანის წიგნის გამოცემის თემა. თეა წულუკიანის მხარდასაჭერად ერთდროულად რამდენიმე დეპუტატმა მოიცალა.
„კარგ მთქმელს კარგი მსმენელი ჭირდება!“ – დაწერა და თეა წულუკიანის ციტატები გამოაქვეყნა ნერიმან ცინცაძემ.
სტატუსი არ დაწერა, მაგრამ „მარშალპრესის“ ნიუსი გააზიარა ფეიქბუქგვერდზე ზურაბ ნაკაიძემ. ნიუსის სათაური ესაა: „თეა წულუკიანის ღირსეული პასუხი მყვირალებს, წიკვინებს, ინტრიგანებს და საზოგადოებას.“ მედიის განვითარების ფონდის არაერთი კვლევის მიხედვით, „მარშალპრესი“ კრემლისტური მედიასაშუალებაა.
თეა წულუკიანის მხარდაჭერა არ დაავიწყდა არც თენგიზ აფხაზავას. ის ფრაქცია „ქართული ოცნების“ ხელმძღვანელია საკრებულოში, რომელიც ვერ შეიკრიბა და ვერ მუშაობს.
საკრებულოს „ოცნების“ ყველა წევრს აქვს გაზიარებული ინფორმაცია იმის შესახებ, რომ ფრაქცია „ქართული ოცნების“თავმჯდომარე და ხუთი მოადგილე მზად არიან არათუ მოუსმინონ მოქალაქეებს, არამედ მუშაობენ „გამოკვეთილი პრობლემების მოგვარებაზე“. საკრებულოს წევრები არაფერს წერენ იმაზე, თუ როგორ შეიძლება მოაგვაროს პრობლემა ამ ფორმატში საკრებულოს წევრმა, როცა საკრებულო ვერ ფუნქციონირებს და გადაწყვეტილებებს ვერ იღებს, პრობლემურ საკითხებზე კი, რაც რეალურად მოსახლეობას აწუხებს, საკრებულოში მმართველი პოლიტიკური პარტიის წარმომადგენლები საჯაროდ არაფერს ამბობენ.
ქართული ოცნების“ კვოტით შესული წევრები ამბობენ კიდეც, რომ არჩეული მერი მათივე პოლიტიკური ძალის წარმომადგენელია და კონტროლის, კრიტიკული დამოკიდებულებების გარეშე აგვარებენ პრობლემებს, მაგრამ ასეთ შემთხვევაში გაუგებარია თვითმმართველობის როლი, ანუ მოქალაქეების აქტიური ჩართულობის, ღიაობის გარეშე როგორ გვარდება პრობლემები?
ან რა პრობლემები მოგვარდა? – საკრებულოს წევრების ფეისბუქპოსტების მიხედვით, გვარდება ქალაქის, ან ბულვარის დასუფთავება შტორმის, თუ თოვის შემდეგ.
„…აი, ამიტომ დავუჭირეთ მხარი ბიუჯეტს,“ – დაუწერია ნერიმან ცინცაძეს. ისიც არჩილ ჩიქოვანის სატელევიზიო ინტერვიუს აზიარებს ავარიულ სახლებზე. ნერიმან ცინცაძე წინა მოწვევის საკრებულოს წევრიც იყო „ქართული ოცნებიდან“. ამ მოკლე პოსტით კი, ის კიდევ ერთხელ ცდილობს გამართლებას – რატომ შეიძლება იყოს სწორი, როცა ახალი საკრებულო ქალაქმა აირჩია, ახალ ბიუჯეტს კი 2017 წელს არჩეული ამტკიცებს.
2022 წლის ბათუმის ბიუჯეტი წინა მოწვევის საკრებულომ დაამტკიცა.
ბათუმის საკრებულოში, რომელიც ვერ მუშაობს, ფრაქცია „ქართული ოცნების“ თავმჯდომარის, თენგიზ აფხაზავას შრომის ანაზღაურება თვეში 2900 ლარია. ხელფასს იღებს თავმჯდომარის ხუთივე მოადგილეც. მათი ჯამაგირი თვეში 2-2 ათასი ლარია. საკრებულოს რიგითი წევრები კი, ამ ეტაპზე უფლებამოსილების ხარჯს – 600 ლარსაც ვერ იღებენ.
ბოლო დღეებში გახარიას პარტიაში „საქართველოსთვის“ განვითარებულ მოვლენებსაც ეხმაურებიან საკრებულოს წევრები. მაგალითად, რიჩარდ სირაბიძე ფოტომანიპულაციას აქვეყნებს აღწერით: „ამაღამ უნდა შემოვიდე შენში, ესეც ამათი ოფიციალური ალიანსი“.
ანალოგიური ფოტომანიპულაცია იმავე დღეს გაზიარებული აქვს ასევე უმაღლესი საბჭოს ფრაქცია „ქართული ოცნების“ ხელმძღვანელს, გიორგი მანველიძეს.
რიჩარდ სიბარიძე რომ ბათუმის ნაცვლად უფრო ქვეყნის პოლიტიკური ამბებით არის დაინტერესებული, ჩანს ამ ფეისბუქპოსტიდანაც:
თვითმმართველობის პოლიტიკა ჩანს კიდევ ერთ აქტუალურ საკითხშიც – „ქართული ოცნების“ ლიდერშიპის და ხელისუფლების ოფიციალური პოზიციის მსგავსად, ბათუმელი დეპუტატებიც დუმილს ამჯობინებენ უკრაინაზე, რომელიც ანალიტიკოსების აზრით, პირდაპირ უკავშირდება საქართველოს დამოუკიდებლობას.
გამონაკლისი რიჩარდ სირაბიძეა, რომელსაც უკრაინის შესახებ სახელისუფლებო პარტიის ლიდერების მსგავსად არაფერი დაუწერია, თუმცა ეს ფოტო გამოაქვეყნა:
2021 წლის არჩევნების შემდეგ ბათუმის საკრებულოში უმრავლესობა ოპოზიციამ მოიპოვა, თუმცა საკრებულოს წევრი გახარიას პარტიიდან „საქართველოსთვის“ დამოუკიდებელი დეპუტატი გახდა. მან თქვა, რომ ოპოზიციას მხარს არ დაუჭერს.
ენმ-ს მიერ 24 ნოემბერს გავრცელებული აუდიო ფაილის მიხედვით კი, „ქართული ოცნებიდან“ ნეიტრალობას სთხოვდნენ ნუგზარ ფუტკარაძეს 100 ათასი ამერიკული დოლარის სანაცვლოდ. ნუგზარ ფუტკარაძე 18 ნოემბერს გარდაიცვალა. ამ საქმეზე სამართალდამცველებს ჯერ არაფერი გამოუძიებიათ. ამ ეტაპზე ბათუმის საკრებულოში ოპოზიციასა და „ქართულ ოცნებას“ შორის ხმები ასე ნაწილდება: 17 : 17.