აღსრულების ეროვნულმა ბიურომ საზღვაო აკადემიასთან დაკავშირებით აჭარის პროკურატურას მიმართა. განცხადებაში ნათქვამია, რომ საზღვაო აკადემია არ ასრულებს სასამართლოს გადაწყვეტილებას, რომლის მიხედვით, აკადემია ვალდებულია დაუყოვნებლივ აღედგინოს სამსახურში ყოფილი ლექტორი ვაჟა ანანიძე და მას მისცეს განაცდური ხელფასიც.
პროკურატურის ინფორმაციით, აღნიშნული განცხადება გადაეგზავნა შს სამინისტროს რეაგირებისთვის.
პროკურატურის ინფორმაციით, დღეს, 2021 წლის პირველ ნოემბერს, ბათუმის პოლიციის მეორე განყოფილებაში დაიწყო გამოძიება სისხლის სამართლის საქმეზე, საზღვაო აკადემიის ხელმძღვანელი პირების მიერ ვაჟა ანანიძის მიმართ სასამართლო გადაწყვეტილების შეუსრულებლობის ფაქტზე.
შს სამინისტროს განმარტებით, გამოძიება დაწყებულია სისხლის სამართლის კოდექსის 381-ე მუხლის პირველი ნაწილით, რაც გულისხმობს ძალაში შესული განაჩენის ან სხვა სასამართლო გადაწყვეტილების შეუსრულებლობას ანდა მისი შესრულებისათვის ხელის შეშლას. ეს ისჯება ჯარიმით ან საზოგადოებისათვის სასარგებლო შრომით, ვადით ას ოთხმოციდან ორას ორმოც საათამდე ანდა თავისუფლების აღკვეთას ორ წლამდე.
ბათუმის საქალაქო სასამართლოს გადაწყვეტილებით, საზღვაო აკადემიას სამსახურიდან დათხოვნილი ვაჟა ანანიძე თავისივე თანამდებობაზე უნდა აღედგინა და განაცდური ხელფასიც აენაზღაურებინა. აკადემიამ ოფიციალურად უარი განაცხადა სასამართლო გადაწყვეტილების აღსრულებაზე. 29 ოქტომბერს კი აღსრულების ეროვნულმა ბიურომ მიმართა პროკურატურას სამართლებრივი რეაგირებისთვის.
„აღსრულების ეროვნული ბიურო გამოთქვამს მზადყოფნას, თქვენს მიერ წარმოდგენილი აღსრულების ქვემდებარე აქტების სისრულეში მოყვანის მიზნით, განახორციელოს კანონით გათვალისწინებული ყველა სახის იძულებითი ღონისძიება“, – წერია სააღსრულებლოს განცხადებაში, რომელიც აჭარის პროკურატურას გადაეგზავნა.
_______________________
ვაჟა ანანიძე საზღვაო აკადემიიდან 2020 წლის 22 ივლისს გაათავისუფლეს. მისი გათავისუფლების ოფიციალურ მიზეზად აკადემიამ ეთიკური საბჭოს გადაწყვეტილება დაასახელა, თავად ვაჟა ანანიძე კი ამბობს, რომ მისი გათავისუფლების მიზეზი ის გახდა, რომ მან გასულ წელს საზღვაო აკადემიის რექტორი და კიდევ რამდენიმე პროფესორი პლაგიატში ამხილა. ის ასევე საუბრობს აკადემიაში არსებულ სხვა პრობლემებზეც.
თანამდებობიდან გათავისუფლების შემდეგ, ერთ წელზე მეტია, რაც ვაჟა ანანიძე საპროტესტო აქციებს მართავს საზღვაო აკადემიის ჭიშკართან. ის აპროტესტებს აკადემიის ეთიკის კომისიის გადაწყვეტილებას მისი აკადემიიდან გაშვების თაობაზე.
ვაჟა ანანიძე ამ ხნის მანძილზე მიმართავდა განათლების სამინისტროს, განათლების ხარისხის განვითარების ეროვნულ ცენტრს, ასევე საზოგადოებას სთხოვდა, დაინტერესებულიყვნენ აკადემიაში არსებული ნეპოტიზმით, პლაგიატით და სავარაუდო კორუფციითაც.
2021 წლის 7 ოქტომბერს, ბათუმის საქალაქო სასამართლომ საზღვაო აკადემიის ყოფილი პროფესორის, ვაჟა ანანიძის საქმეზე გადაწყვეტილება მიიღო. სასამართლოს გადაწყვეტილებით აკადემია ვალდებულია აღადგინოს ვაჟა ანანიძე სამსახურში და კომპენსაციის სახით გადაუხადოს 25 ათასი ლარი.
____________
ფოტოზე: ვაჟა ანანიძის აქცია საზღვაო აკადემიის წინ.
