Batumelebi | 2 ნოემბერს ბათუმში ოპოზიცია აქციას აანონსებს 2 ნოემბერს ბათუმში ოპოზიცია აქციას აანონსებს – Batumelebi
ნეტგაზეთი • RU

2 ნოემბერს ბათუმში ოპოზიცია აქციას აანონსებს

„ერთიანი ნაციონალური მოძრაობის“ ლიდერმა ნიკა მელიამ დღეს, 31 ოქტომბერს, თბილისში, პარლამენტის წინ მიმდინარე აქციაზე განაცხადა, რომ ოპოზიცია სამშაბათიდან იწყებს მასშტაბურ აქციებს.

მისი თქმით, პირველი აქცია 2 ნოემბერს, სამშაბათს, გაიმართება ბათუმში, შემდეგ ქუთაისში, სხვა ქალაქებში და ბოლოს – თბილისში.

„გვჭირდება მცირე დრო, რომ მასშტაბური აქცია, რომელსაც მთელი მსოფლიო დაინახავს, დავგეგმოთ. აქცია, რომელიც გაიმართება კვირა დღეს, განსხვავებული იქნება ყველა აქციისგან ბევრი თვალსაზრისით“, – თქვა ნიკა მელიამ პარლამენტის წინ მიმდინარე აქციაზე.

მელიას თქმით, აქციები პერმანენტულად გაიმართება სხვადასხვა ქალაქში.

„რუსთაველის გამზირიდან წელს დამარცხებულები არ გავალთ, ჩვენ გავალთ გამარჯვებულები,“ – ამბობს მელია. მან აქციიდან ციხეში მოშიმშილე მიხეილ სააკაშვილსაც მიმართა და აღნიშნა, რომ ყველაფერს გააკეთებს მისი ციხიდან დასახსნელად.

ნიკა მელიას თქმით, აქციების პარალელურად, ისინი ოლქებსა და შემდეგ სასამართლოებში გაასაჩივრებენ ყველა საარჩევნო დარღვევას, რათა გაიარონ სრული სამართლებრივი პროცედურები. როგორც მელია ამბობს, ამის მიზანია დასავლელი პარტნიორებისთვის იმის ჩვენება, რომ ოპოზიციის თვითმიზანი აქციები არ არის.

ოპოზიცია არ აღიარებს ადგილობრივი თვითმმართველობის არჩევნების შედეგს, რადგან მიიჩნევს, რომ „ქართულმა ოცნებამ“ ის გააყალბა. არჩევნების შედეგების მიხედვით, 64 ქალაქიდან და მუნიციპალიტეტიდან, მერის არჩევნებში 63 ოლქი მოიგო მმართველმა პარტიამ და მხოლოდ წალენჯიხაში მოიგო ენმ-ს კანდიდატმა.

_____________

ოპოზიციის აქცია თბილისში, პარლამენტის წინ. 31 ოქტომბერი, 2021 წელი. ფოტო: „ნეტგაზეთი“

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.