Batumelebi | 5 ყველაზე უსაფრთხო ქალაქი მსოფლიოში – „ეკონომისტის“ რეიტინგი 5 ყველაზე უსაფრთხო ქალაქი მსოფლიოში – „ეკონომისტის“ რეიტინგი – Batumelebi
RU | GE  

5 ყველაზე უსაფრთხო ქალაქი მსოფლიოში – „ეკონომისტის“ რეიტინგი

2021 წლის უსაფრთხო ქალაქების ინდექსი ჟურნალმა Economist-მა გამოაქვეყნა. გამოცემა მსოფლიოს 60 ქალაქს სხვადასხვა მაჩვენებლის მიხედვით 2015 წლიდან აფასებს.

შეფასებისას გათვალისწინებულია ქალაქების ინფრასტრუქტურა, ციფრული ცხოვრება, პირადი უსაფრთხოება, გარემო, ჯანმრთელობის საკითხები და ა.შ.

„ბიბისის“ ცნობით, Economist-მა წელს ინდექსის შედგენისას გაითვალისწინა კორონავირუსის პანდემიის ფაქტორიც – ვირუსის პროფილაქტიკა და კოვიდით გარდაცვალების მაჩვენებელი.

  • კოპენჰაგენი, დანია 

დანიის დედაქალმა 82,4 ქულა მიიღო ასქულიან სკალაზე და რეიტინგის სათავეში მოექცა.

მთავარი მიზეზი გარემოსდაცვითი საკითხებია – განახლებადი ენერგიის გამოყენების მაჩვენებელი კოპენჰაგენში, ჰაერის სისუფთავე, ნაგვის უსაფრთხო უტილიზაცია და ქალაქის გამწვანების მაღალი დონე.

ორგანიზაცია „საერთაშორისო გამჭვირვალობის“ 2020 წლის მონაცემებით, დანიას, მსოფლიო ქვეყნებს შორის, კორუფციის ყველაზე დაბალი მაჩვენებელი აქვს ახალ ზელანდიასთან ერთად.

  • ტორონტო, კანადა 

„ეკონომისტის“ რეიტინგში მეორე ადგილზეა ტორონტო, კანადის ყველაზე დიდი ქალაქი.

ტორონტო რეიტინგში მეორე ადგილს, ძირითადად, გამართული ინფრასტრუქტურისა და გარემოსდაცვითი საკითხების გამო იკავებს.

პირადი უსაფრთხოების მხრივ ტორონტოს პლუსებია მულტიკულტურულობა და ტოლერანტული მოსახლეობა.
  • სინგაპური 

სინგაპური რეიტინგში მესამე ადგილზეა საერთო მაჩვენებლებით, თუმცა მეორე ადგილს იკავებს ციფრული მომსახურებით, ჯანმრთელობის დაცვითა და უსაფრთხო ინფრასტრუქტურის მაჩვენებლებით.

სინგაპური ერთ-ერთი ყველაზე აცრილი ქალაქია მსოფლიოში – აქ კოვიდზე აცრილია მოსახლეობის 80 პროცენტი.

  • სიდნეი, ავსტრალია 

მეოთხე ადგილზეა სიდნეი.

სიდნეიში კოვიდით გარდაცვალების მაჩვენებელი 100 000 მოსახლეზე ერთ-ერთი ყველაზე დაბალია მსოფლიოში.

ასევე, სიდნეი პირველ ადგილზეა რეიტინგში ციფრული ტექნოლოგიების უსაფრთხოების მიზნით გამოყენების მიმართულებით, რაც გულისხმობს დაცულ პირად მონაცემებს, ნაგვის ურნებთან და ძელსკამებთან დამონტაჟებულ სენსორებს, რაც ქალაქის სერვისების განვითარებისთვის გამოიყენება და ა.შ.

ქალაქში განათების და ვიდეოკამერების სპეციალური სისტემაა დამონტაჟებული, რაც ერთდროულად ზოგავს ენერგიას და ამავე დროს უზრუნველყოფს უსაფრთხოებას.

  • ტოკიო, იაპონია

ტოკიომ წელს პირველი ადგილიდან მეხუთეზე გადაინაცვლა. პირველ ხუთეულში ქალაქი დარჩა ჯანდაცვის საკითხების გამო, რაც მოიცავს ისეთ საკითხებს, როგორიცაა: კოვიდის წინააღმდეგ ეფექტური ბრძოლა, სამედიცინო მომსახურება, სიცოცხლის ხანგრძლივობა და კარგი ფსიქიკური ჯანმრთელობა.

ტოკიოს მაღალი მაჩვენებელი აქვს ქალაქის ინფრასტრუქტურის, საქალაქო ტრანსპორტის და ქვეითთა უსაფრთხოების თვალსაზრისითაც.

__________________

ამ ქალაქების გარდა, 2021 წლის უსაფრთხო ქალაქების პირველ ათეულში შედის: ამსტერდამი [ნიდერლანდები], ველინგტონი [ახალი ზელანდია], ჰონგ კონგი [ჩინეთი], მელბურნი [ავსტრალია] და სტოკჰოლმი [შვედეთი].

აშშ-ში ყველაზე უსაფრთხო ქალაქებია ნიუ იორკი და ვაშინგტონი.

„ეკონომისტის“ ინდექსი 600 ქალაქის მონაცემებს მოიცავს, მათ შორის არ არის თბილისი.

____________

წყარო: BBC, economist.

ფოტოზე: ტორონტო. unsplash.com

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com