პოლიციის ის განყოფილება, სადაც დასაქმებულ პოლიციელს ედავებიან დანაშაულის ჩადენას, ვეღარ გამოიძიებს ამ საქმეს. გადაწყვეტილება საკონსტიტუციო სასამართლომ დღეს, 23 სექტემბერს, მიიღო.
მოსარჩელე გიორგი ცერცვაძეა, რომელიც ამბობდა, რომ პოლიციელებმა დაკავების დროს მასზე ფიზიკურად იძალეს. მოქალაქემ პოლიციელებს უჩივლა, თუმცა საქმე პროკურატურის დავალებით იგივე საგამოძიებო ორგანომ გამოიძია, სადაც ცერცვაძის მხრიდან დადანაშაულებული პოლიციელები მუშაობდნენ.
გიორგი ცერცვაძე გორში დააკავეს პოლიციის დაუმორჩილებლობისა და სიტყვიერი შეურაცხყოფისთვის ადმინისტრაციული წესით. მისი თქმით, ის პოლიციის განყოფილებაში ღირსების შემლახავი და არასათანადო მოპყრობის მსხვერპლი გახდა.
სარჩელის თანდართულ დოკუმენტაციაში წარმოდგენილია გიორგი ცერცვაძის ადმინისტრაციული დაკავების ოქმი, ასევე, სამედიცინო ექსპერტიზის დასკვნა, რომლის მიხედვითაც პოლიციის განყოფილებაში შესვლამდე „მოქალაქეს არ აღენიშნება დაზიანებები, ხოლო დატოვების შემდგომ – აღენიშნება“.
საქმე წარმოდგენილია ცერცვაძის წარმომადგენელსა და პროკურატურას შორის არსებული მიმოწერა, რომლის მიხედვითაც დასტურდება, რომ მოქალაქეს უარი ეთქვა დაზარალებულად ცნობაზე.
საკონსტიტუციო სასამართლომ განმარტა, რომ „გამოძიების წარმოება იმ საგამოძიებო ორგანოს მიერ, რომლის თანამშრომლის მიერ შესაძლო არასათანადო მოპყრობის ფაქტზეც არსებობს საფუძვლიანი საჩივარი, გამოძიების დამოუკიდებლობისა და მიუკერძოებლობის პრინციპის უგულებელყოფის ერთ-ერთი ყველაზე თვალსაჩინო შემთხვევაა“, – აღნიშნულია საკონსტიტუციო სასამართლოს მიერ გავრცელებულ ინფორმაციაში.
საკონსტიტუციო სასამართლოს ამ გადაწყვეტილების შემდეგ პარლამენტმა უნდა შეცვალოს სამართლებრივი ნორმა, რომლის მიხედვითაც პროკურორს შეეძლო საგამოძიებო ქვემდებარეობის მიუხედავად იმ საგამოძიებო ორგანოსთვის გადაეცა საქმე, რომლის თანამშრომელსაც უფლებების დარღვევას ედავებოდნენ.
საკონსტიტუციო სასამართლო მიუთითებს საგამონაკლისო შემთხვევაზეც:
„როდესაც შესაძლოა, გამოძიების ეფექტიანობა მოითხოვდეს ასეთი ორგანოს მიერ საგამოძიებო მოქმედებების წარმართვას,“ – აცხადებენ საკონსტიტუციო სასამართლოში.
გადაწყვეტილება საკონსტიტუციო სასამართლოს პირველმა კოლეგიამ მიიღო.
