მთავარი,სიახლეები

იგეგმება საჯარო პირების პირადი ცხოვრების ამსახველი ჩანაწერების გავრცელება – მდინარაძე

14.09.2021 • 2876
იგეგმება საჯარო პირების პირადი ცხოვრების ამსახველი ჩანაწერების გავრცელება  – მდინარაძე

„ქართული ოცნების“ საპარლამენტო ლიდერის, მამუკა მდინარაძის განცხადებით, 2 ოქტომბრის არჩევნების წინ ოპოზიცია, კერძოდ „ერთიანი ნაციონალური მოძრაობა“ გეგმავს საჯარო პირების პირადი ცხოვრების ამსახველი კადრების გავრცელებას.

„გვაქვს ინფორმაცია, რომ ერთიანი ნაციონალური მოძრაობის კუთვნილი პარტიული ტელევიზიების მიერ გუშინდელი დღიდან აგორებული ბოლშევიკური კამპანია ემსახურება ფონის შემზადებას პირადი ცხოვრების ამსახველი გარკვეული ჩანაწერების თუ მათი ფაბრიკაციის გავრცელებისათვის, რომლის ინტერნეტში ატვირთვა, ჩვენი ინფორმაციით, მომდევნო დღეებში, ნაციონალური მოძრაობის მიერ ქვეყნის ფარგლებს გარეთ იგეგმება.

ჩვენი ინფორმაციით, აღნიშნული ჩანაწერები უკავშირდება საჯარო პირებს და მიზნად ისახავს წინასაარჩევნოდ საზოგადოებაში მღელვარების გამოწვევას.

ჩანაწერის შინაარსიდან გამომდინარე, რაც ჩვენთვის ცნობილია, მხოლოდ ბოლშევიკური აზროვნების ადამიანებს შეიძლება თავში აზრად მოუვიდეს მათი გავრცელება.

კატეგორიულად ვაფრთხილებთ ყველას, თავი შეიკავონ აღნიშნული ქმედებისგან, ამასთან, დარწმუნებულნი ვართ, თუ ისინი ამგვარ სიბინძურეს იკადრებენ და აღნიშნულ ჩანაწერებს გაავრცელებენ, საზოგადოების მღელვარების და რისხვის ობიექტი სწორედ ნაციონალური მოძრაობა და მისი თანამზრახველები გახდებიან.

სამართალდამცავებს მოვუწოდებთ, მიიღონ ყველა ზომა ამ საქმის ჯეროვნად გამოსაძიებლად და საზოგადოებისთვის სრული ინფორმაციის მისაწოდებლად“, – განაცხადა მდინარაძემ.

მდინარაძის განცხადებას ფეისბუქზე გამოეხმაურა ნიკა გვარამია, ტელეკომპანია „მთავარის“ დირექტორი.

„ზუსტად 2 საათზე ვიყავი ჩართვაზე. სტუდიაში იყვნენ ინგა გრიგოლია და ვახო სანაია.

ეთერში მოვყევი, რაზე მსჯელობდა გუშინ ქართული ოცნება: ამ საშინელ ვითარებაში, რომელშიც ჩავარდნენ, საინფორმაციო გადაფარვის შესაძლებლობად განიხილეს პირადი ცხოვრების კადრების გამოქვეყნება ანონიმური წყაროს მეშვეობით. ზუსტად ერთ საათში ამას მოჰყვა მამუკა მდინარაძის ბრიფინგი, რომლითაც ეს დაადასტურა, ოღონდ იქვე დააყოლა, რომ ამას ოპოზიცია იზამს უცხოეთში,“ – წერს ნიკა გვარამია და იქვე მიმართავს მამუკა მდინარაძეს:

„ამ ბოდვაზე კომენტარს არ გავაკეთებ. ყველაფრის მომსმენ, გადამღებ, გამომქვეყნებელი ვინაა ამ ქვეყანაში ყველამ იცის. უკრაინული ვიკილიქსების და ჰაკიმ ფაშებიც ყველას ახსოვს. მაგ სისულელეებს, ჯობია ის გვითხარი, ვის დროს გადაღებულ კადრებზე ლაპარაკობ? ხომ არ გამომრჩა და ხომ არ თქვი, ჩვენ მიერ გადაღებულ სექსებს გამოაქვეყნებენ, ოღონდ გამომქვეყნებელი ჩვენ არ ვართო? თუ ეგეც სააკაშვილმა გადაიღო ჭოგრიტით კიევიდანო, ეგ თქვი და გამომრჩა? იქნებ ახალი ბრიფინგით ჩააზუსტო“.

რა ხდება? 

13 სექტემბერს საქართველოში მედიასაშუალებებმა მიიღეს ბმული ჰაკიმ ფაშას სახელით და სათაურით – „სუსის კომპრომატი საპატრიარქოს წინააღმდეგ“.

ბმულზე ასობით ფაილია, რომლებშიც მოცემულია პირადი ინფორმაცია მართლმადიდებელი სასულიერო და სამოქალაქო პირების საჯარო და პირადი ცხოვრების, სექსუალური კავშირების შესახებ. ინფორმაციას თან ერთვის ფოტოები, პირადი ნომრები, ტელეფონის ნომრები.

სისტემურობიდან და შინაარსიდან გამომდინარე, ფაილები, სავარაუდოდ, სუსიდან არის გაჟონილი და 2014 წლიდან 2021 წლის ჩათვლით თარიღდება.

ზოგიერთი ცნობა შეიცავს სისხლის სამართლის დანაშაულის ნიშნებს, მათ შორის, საუბარია სასულიერო პირების მხრიდან სექსუალური კონტაქტის დამყარებაზე არასრულწლოვნებთან, ქრთამის აღებაზე პატიმართა შეწყალებაზე შუამდგომლობის სანაცვლოდ და სხვა.

გადაბეჭდვის წესი


ასევე: