Batumelebi | უნდა გასხვისდეს თუ არა იჯარით ბათუმში პლაჟები? – მერობის 3 კანდიდატის პასუხი უნდა გასხვისდეს თუ არა იჯარით ბათუმში პლაჟები? – მერობის 3 კანდიდატის პასუხი – Batumelebi
ნეტგაზეთი • RU

უნდა გასხვისდეს თუ არა იჯარით ბათუმში პლაჟები? – მერობის 3 კანდიდატის პასუხი

2 ოქტომბერს ადგილობრივი თვითმმართველობის არჩევნებზე ბათუმმა ქალაქის მერი უნდა აირჩიოს. “ბათუმელებმა” მერობის სამ კანდიდატს სხვადასხვა საკითხზე დაუსვა კითხვები, რომლებსაც პერიოდულად შემოგთავაზებთ.

უნდა გასხვისდეს თუ არა მრავალწლიანი იჯარით ბათუმში პლაჟები? –  ჰკითხა “ბათუმელებმა” ბათუმის მერობის სამ კანდიდატს.

  • ირაკლი მიქელაძე, ბათუმის მერობის კანდიდატი, პარტია „საქართველოსთვის“ – გახარიას პარტია:

რა თქმა უნდა არა. ბათუმის პლაჟი, ისევე, როგორც ბათუმის ბულვარი, ბათუმელების საკუთრება. ამ შემთხვევაში ჩვენთვის ყველაზე მთავარი, ამოსავალი პრინციპი იქნება ის, რომ ბათუმელებს უნდა ჰქონდეთ შეუზღუდავი წვდომა პლაჟზე.

სხვა ყველა, ის კონკრეტული ქეისები, რასაც თქვენ გულისხმობთ, ეს მოხდება მხოლოდ და მხოლოდ ინდივიდუალური განხილვების შემდგომ. მაგრამ ჩვენთვის ამოსავალი პრინციპი ყოველთვის იქნება, რომ ბათუმის პლაჟი, ბათუმის ბულვარი და ის რაც არის ბათუმის მთავარი სახე, ყოველთვის იქნება ჩვენი თანაქალაქელების საკუთრებაში და მფლობელობაში.

  • გიორგი კირთაძე, ბათუმის მერობის კანდიდატი ოპოზიციური ერთობიდან:

პლაჟის რაღაცა მონაკვეთის კომერციული დატვირთვისთვის მსუბუქი კონსტრუქციებით, ან არ ვიცი, შეზლონგების გასაქირავებლად გაცემის მომხრე მე ვარ. მიმაჩნია, რომ კერძო სექტორის შემოყვანა პლაჟის რაღაც ნაწილზე არ არის ცუდი, ოღონდ კიდევ ერთხელ ვიმეორებ – ეს არ უნდა ეხებოდეს იმას, რომ ვიღაცებს აეკრძალოთ ბათუმის პლაჟის ნებისმიერ მონაკვეთში თავისუფლად შესვლა. ცალსახად ეს არის გამორიცხული და მიმაჩნია, რომ ეს არ უნდა ხდებოდეს.

მიმაჩნია, რომ დაუშვებელია იმ ტიპის საკუთრებაში პლაჟის გადაცემა, რომელზე შესვლაც დანარჩენი მოქალაქეებისთვის იქნება შეზღუდული.

  • არჩილ ჩიქოვანი, ბათუმის მერობის კანდიდატი პარტია „ქართული ოცნებიდან“:

იჯარებთან დაკავშირებით მესმის ეს საკითხი. ჩვენს მოქალაქეებს და ჩვენს ამომრჩეველსაც, ბუნებრივია, აქვს აზრთა სხვადასხვაობა.

ეს საკითხი – როგორც მრავალწლიანი იჯარის საკითხი, ასევე სხვაგვარად განკარგვის საკითხი,  დამოკიდებულია კონკრეტულ გადაწყვეტილებებზე, კონკრეტულ განვითარებაზე.

ვიცით გადაწყვეტილებების ნაწილი, რომელიც იყო მიღებული და არ მოსწონდათ ჩვენს მოქალაქეებს. ამ ნაწილში ჩვენ მოქალაქეებთან კომუნიკაციის შემდგომ ეს გადაწყვეტილებები ჩვენმა პოლიტიკურმა გუნდმა არ მიიღო. ბუნებრივია, ჩვენ ცალსახად გეტყვით, რომ დამაზიანებელ გადაწყვეტილებებს, რომელიც ჩვენს ქალაქს და ჩვენს თანამოქალაქეებს დააზიანებს, არასოდეს არ მივიღებთ.

ნეტგაზეთის მასალების სხვა გამოცემებში გადაბეჭდვის წესი
ავტორი