შრომის ინსპექციის სამსახური აცხადებს, რომ წუხელ რესტორანი „სანსეტ ბათუმი“ დალუქა.
„ადგილზე ფართომასშტაბიანი გასართობი ღონისძიება მიმდინარეობდა. ჯანდაცვის მინისტრის ბრძანებით განსაზღვრული რეკომენდაციების კრიტიკული შეუსაბამობების გამო, შრომის ინსპექციამ ობიექტის დალუქვის გადაწყვეტილება მიიღო.“ – აცხადებს სამსახური.
სამსახურის ინფორმაციით, ბოლო 24 საათის განმავლობაში, შრომის ინსპექციის მიერ ეს მესამე დალუქული ობიექტია. ჯამში, ერთ კვირაში, მთელი ქვეყნის მასშტაბით 18 ობიექტი დაილუქა.
„შრომის ინსპექციის სამსახური საზოგადოებას დაწესებული რეკომენდაციების დაცვისკენ კიდევ ერთხელ მოუწოდებს. წინააღმდეგ შემთხვევაში კი, კანონით განსაზღვრული ღონისძიებების გატარების შესახებ აფრთხილებს.“ – აღნიშნულია ინსპექციის მიერ გავრცელებულ ინფორმაციაში.
შრომის ინსპექციას უფლება აქვს აკრძალული ღონისძიების გამართვის შემთხვევაში დახუროს მთლიანად ობიექტი ან დროებით აკრძალოს ამ ობიექტზე არსებული კონკრეტული სივრცის ან ისეთი ნივთის გამოყენება, რომელიც „უშუალოდ კავშირშია ვირუსის გავრცელების პრევენციული ღონისძიების განხორციელებასთან.“
22 აგვისტოს დილის მონაცემებით, აჭარაში, ბოლო 24 საათის განმავლობაში კორონავირუსის 598 ახალი შემთხვევა დადასტურდა. ამავე პერიოდში კორონავირუსით გარდაიცვალა 3 პაციენტი.
3 803 ახალი შემთხვევა და 48 გარდაცვლილი – კორონავირუსი საქართველოში
