შრომის ინსპექციის სამსახურმა „შპს რეტროსა“ და „შპს რეტრო 2“-ს სამუშაო პროცესი შეუჩერა.
უწყებამ დაავალდებულა კომპანია სრულად აუნაზღაუროს თანამშრომლებს სახელფასო დანაკლისი, როგორც ზეგანაკვეთური, ასევე, კუთვნილი შვებულების ფულადი ანაზღაურების სახით.
ინსპექციის ინფორმაციით, შემოწმდა კომპანიის 3 ობიექტი თბილისსა და ბათუმში:
„უსაფრთხოების ნორმების დარღვევისა და არასათანადო სამუშაო პირობების გამო „შპს რეტრო“ და „შპს რეტრო 2“ სამუშაო პროცესის შეჩერებასთან ერთად, დამატებით 30 000 ლარით დაჯარიმდა“ – წერს შრომის ინსპექცია.
მიმტანის ცემის ფაქტზე ბათუმში რესტორან „რეტროს“ მფლობელი დღეს, 5 ივნისს დააკავეს.
- რა ხდება?
3 ივნისს ბათუმში, რესტორან „რეტროს“ მფლობელმა მიმტანს სცემა. ძალადობის დამადასტურებელი კადრები „რეტროს“ თანამშრომელმა გადაიღო. ვიდეოში ჩანს, თუ როგორ კრავს ხელს რესტორნის მფლობელი მიმტანს და კარებში აგდებს. შემდეგ ისმის კივილს ხმა.
„რეტროს“ თანამშრომლების თქმით, თეიმურაზ ვარშანიძემ მიმტანის ცემა ქუჩაშიც გააგრძელა.
კადრების გავრცელების შემდეგ პოლიციამ გამოძიება დაიწყო სისხლის სამართლის კოდექსის 126-ე, ძალადობის მუხლით, სოციალურ ქსელში გავრცელებული ვიდეოს საფუძველზე. მეორე დღესვე დააკავეს „რეტროს“ მფლობელი, თეიმურაზ ვარშანიძე, „რეტროში“ კი შრომითი ინსპექცია შევიდა.
დღეს, 5 ივნისს, რესტორანი „რეტრო“ 15-მა თანამშრომელმა ოფიციალურად დატოვა.
ამავე თემაზე:
„რეტრო“ ყველამ დავტოვეთ, რუსების და მფლობელის ნათესავების გარდა – რესტორნის თანამშრომლები
