Batumelebi | ახალი სკვერი და სარეკრეაციო ზონა – 1,3 მილიონი ბათუმის ბიუჯეტიდან ახალი სკვერი და სარეკრეაციო ზონა – 1,3 მილიონი ბათუმის ბიუჯეტიდან – Batumelebi
RU | GE  

ახალი სკვერი და სარეკრეაციო ზონა – 1,3 მილიონი ბათუმის ბიუჯეტიდან

ბათუმში, ლეონიძის ქუჩაზე სკვერი, ხოლო გონიოს დასახლებაში რეკრეაციული სივრცე მოეწყობა. დაგეგმილია ასევე ქალაქის სხვადასხვა ადგილზე 6 სპორტული მოედნის რეაბილიტაცია. სამუშაოებისთვის ქალაქის ბიუჯეტიდან ჯამში 1,3 მილიონი ლარია გამოყოფილი.

აღსანიშნავია, რომ ბათუმის ტერიტორიაზე უკვე არსებული რეკრეაციული სივრცეების 80%-ზე მეტს არ აქვს მინიჭებული შესაბამისი სტატუსი. გამწვანებულ ადგილებს თუ მის გარკვეულ ნაწილს კი, მერია ან ასხვისებს, ან იჯარით გასცემს.

ამჯერად სკვერის მოწყობა დაგეგმილია ლეონიძის ქუჩაზე – გაგარინისა და ლეონიძის ქუჩების კვეთაში; ახალ სპორტკომპლექსთან. აქ უშუალოდ გამწვანებას, პროექტის მიხედვით, მთლიანობაში 963,1 კვადრატული მეტრი ფართობი დაეთმობა;

რეკრეაციული სივრცის მოწყობა კი დაგეგმილის გონიოს დასახლებაში – პლაჟთან ახლოს; აფსაროსის მე-3 შესახვევის მიმდებარედ. პროექტის თანახმად, ამ მიზნით მთლიანობაში გამოყოფილია 3 651 კვადრატული მეტრი ტერიტორია, ბილიკებისა და პარკინგის ჩათვლით.

ბათუმში „სარეკრეაციო სივრცეების კეთილმოწყობასა და შესაბამისი ინვენტარის განთავსებაზე, სპორტული მოედნების რეაბილიტაციაზე, ასევე დასასვენებელი სკვერის მოწყობაზე“ ტენდერი მერიის საქალაქო ინფრასტრუქტურისა და კეთილმოწყობის სამმართველომ გამოაცხადა.

სატენდერო თანხა ჯამში 1 350 000 ლარია. წინადადებების მიღება 2021 წლის 5 სექტემბერს დაიწყება და 10 სექტემბერს დასრულდება.

სამუშაოები 2021 წლის 15 დეკემბრის ჩათვლით პერიოდში უნდა დასრულდეს.

ამავე ტენდერის ფარგლებში სპორტული მოედნების რეაბილიტაცია იგეგმება შემდეგ მისამართებზე:

  • ჭავჭავაძის 78-88
  • პუშკინის 35-ა
  • პუშკინის 125-129
  • ვარშანიძის 102
  • ლერმონტოვის 125
  • ადლიის 99-101-103
როგორი იქნება ახალი სკვერი და სარეკრეაციო სივრცე, ნახეთ რენდერები:

ახალი სკვერი ლეონიძის ქუჩაზე / რენდერი

ახალი სარეკრეაციო სივრცე გონიოში / რენდერი

2020 წელს ბათუმში ჩატარდა სამოქალაქო მონიტორინგი, რომლის მიზანიც იყო ქალაქში არსებული რეკრეაციული სივრცეების მოძიება, შესწავლა და აღწერა. აღმოჩნდა, რომ ქალაქის ტერიტორიაზე უკვე არსებული რეკრეაციული სივრცეების 80%-ზე მეტს არ აქვს შესაბამისი სტატუსი მინიჭებული.

საინიციატივო ჯგუფმა ბათუმის საკრებულოში ონლაინპეტიციაც კი დაარეგისტრირა. მოქალაქეები გარკვეული ტერიტორიებისთვის, მაგალითად, როგორიცაა: ჭოროხის დელტა [გონიოს ყოფილი პოლიგონი] ტყე-პარკის სტატუსის მინიჭებას ითხოვენ.

2021 წლის 17 აგვისტოს კი, საქართველოს პრემიერმა ღარიბაშვილმა, გონიოს ყოფილი პოლიგონის ტერიტორიაზე საუბრისას განაცხადა, რომ აქ „უნდა აშენდეს ახალი ქალაქი თავისი კაზინოებითოფისებით, ბანკებით“:

რამდენად მწვანეა ბათუმი და როგორია ამ მხრივ ბალანსი ქალაქის ცენტრსა და გარეუბნებს შორის? – ამ საკითხზე მსჯელობა ბათუმში მას შემდეგ უფრო აქტუალურია, რაც ქალაქში მშენებლობების ბუმია:

როცა ქალაქს სუნთქვა უჭირს – ბეტონის ქვეშ დამარხული სკვერები ბათუმში

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com