Batumelebi | ოპოზიციური პარტიების მაჟორიტარობის კანდიდატები ბათუმში – „ყველა ბიძინას წინააღმდეგ“ ოპოზიციური პარტიების მაჟორიტარობის კანდიდატები ბათუმში – „ყველა ბიძინას წინააღმდეგ“ – Batumelebi
RU | GE  

ოპოზიციური პარტიების მაჟორიტარობის კანდიდატები ბათუმში – „ყველა ბიძინას წინააღმდეგ“

დღეს, 18 აგვისტოს, ბათუმში ოპოზიციურმა პარტიებმა 2 ოქტომბრის თვითმმართველობის არჩევნებზე გაერთიანების შესახებ განაცხადეს.

შეთანხმების თანახმად, 2 ოქტომბრის არჩევნებზე სხვადასხვა ოპოზიციური ძალა აჭარაში იმოქმედებს სტრატეგიით – ყველა ბიძინა ივანიშვილის წინააღმდეგ.

„ჩვენ მოვახერხეთ, რომ ჩვენი პირადი და პარტიული შეხედულებები და ამბიციები გვერდით გადაგვედო და მიუხედავად ჩვენი განსხვავებული ხედვისა, შევთანხმდით, გავისტუმროთ ხელისუფლებიდან ბიძინა ივანიშვილის ოლიგარქიული რეჟიმი,“ – განაცხადა გენრი დოლიძემ, პოლიტიკურმა აქტივისტმა, რომელიც დღეს ოპოზიციური პარტიების სპიკერი იყო.

ოპოზიციურმა პარტიებმა: „ერთიანმა ნაციონალურმა მოძრაობამ“, „სტრატეგია აღმაშენებელმა“, „დროამ“, „ევროპულმა საქართველომ“ და „ლელომ“ ხელი მოაწერეს ორპუნქტიან შეთანხმებას/მანიფესტს, რომლის ფარგლებშიც პარტიები იღებენ ვალდებულებას:

  1. მჭიდროდ ითანამშრომლონ საარჩევნო საკითხებში, მხარი დაუჭიროთ წინასწარ შეთანხმებულ კანდიდატებს და ამ არჩევნებში იმუშაონ პრინციპით – ყველა ბიძინა ივანიშვილის წინააღმდეგ.
  2. არჩევნებში ოპოზიციის გამარჯვების შემთხვევაში გააგრძელონ თანამშრომლობა და ერთობლივად მართონ ბათუმისა და აჭარის მუნიციპალიტეტების თვითმმართველობები.

დღესვე შეხვედრაზე დასახელდნენ ბათუმის მაჟორიტარი დეპუტატობის კანდიდატები ოპოზიციიდან. ესენი არიან:

  • ვახტანგ კალოიანი, „ევროპული საქართველო“ – ძველი ბათუმის დასახლება
  • ბექა დიასამიძე, „სტრატეგია აღმაშენებელი“ –  კახაბრის, სამრეწველო და აღმაშენებლის ერთეულები
  • ნაზი ფუტკარაძე, „ერთიანი ნაციონალური მოძრაობა“ –  ჩაქვი, განთიადი, მწვანე კონცხი, ბარცხანა
  • გენო თებიძე, „ლელო საქართველოსთვის“ – ხიმშიაშვილის დასახლება
  • ნოდარ დუმბაძე, „ერთიანი ნაციონალური მოძრაობა“ – ჭაობის დასახლება
  • დიმიტრი დარჩია, „დროა – ელენე ხოშტარია“ – მანთაშევისა და ბონის დასახლება
  • ნუგზარ ფუტკარაძე, „ერთიანი ნაციონალური მოძრაობა“ – ადლია, ანგისის დასახლება

დღესვე ცნობილი გახდა, რომ ოპოზიციის შეთანხმების თანახმად, ოპოზიციის კანდიდატი ბათუმის საკრებულოს თავმჯდომარის პოსტზე იქნება ვახტანგ კალოიანი, „ევროპული საქართველოს“ წევრი.

გაერთიანებული ოპოზიციის ბათუმის მერობის კანდიდატი კი, გიორგი კირთაძეა. იგი ამჟამად „ერთიანი ნაციონალური მოძრაობის“ რეგიონული ორგანიზაციის ხელმძღვანელია. 2010-2013 წლებში გიორგი კირთაძე იყო ბათუმის საკრებულოს თავმჯდომარე.

მერის მოადგილეობის კანდიდატებად ოპოზიციამ სამოქალაქო აქტივისტები – გენრი დოლიძე და გოჩა გუგუნავა დაასახელა.

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com