ხულოში, კურორტ ბეშუმში, კვირას, პირველ აგვისტოს, ტრადიციული სახალხო ზეიმი – შუამთობა გაიმართება. ღონისძიებები დღის 12 საათზე დაიწყება.
შუამთობა, რომელიც ბოლო ათწლეულებია აგვისტოს პირველ შაბათ-კვირას იმართებოდა, 2020 წელს კორონავირუსის პანდემიის გამო არ ჩატარებულა.
„ღონისძიებები იმართება ღია ცის ქვეშ და ყველა რეკომენდაცია და რეგულაციები, რაც ღია სივრცისთვის არის გაცემული, დაცული იქნება“, – უთხრა „ბათუმელებს“ გოგი ბოლქვაძემ, ხულოს მერიის განათლებისა და კულტურის განყოფილების უფროსმა.
ღონისძიების ორგანიზებისთვის ხულოს მერია 45 875 ლარს ტენდერის გარეშე დახარჯავს, რისთვისაც შესყიდვების სააგენტოსგან თანხმობას ელოდება.
„მსოფლიოში სხვადასხვა მასშტაბებით გავრცელებულია კოვიდვირუსი და მათ შორის საქართველოშიც. არსებული სიტუაციიდან და შეზღუდვებიდან გამომდინარე, გასულ 2020 წელს პირველად არ მოხდა აღნიშნული ღონისძიების ჩატარება, ასევე მიმდინარე პერიოდისათვისაც არ იყო გადაწყვეტილი ღონისძიების დიდი მასშტაბებით ჩატარება, რის გამოც შესყიდვები წინასწარ ვერ იყო დაგეგმილი… რადგან არ იყო წინასწარ გადაწყვეტილი ღონისძიების ჩატარება, მიმდინარე წელს ჩატარდება 01 აგვისტოს კვირა დღეს, აღნიშნულ ვადაში ფიზიკურად ვერ ესწრება ელექტრონული ტენდერისა და კონკურსის გამოცხადება-ჩატარება“, – აღნიშნულია ხულოს მუნიციპალიტეტის განაცხადში.
მთავარი ფოტო: კურორტი ბეშუმი/„ბათუმელების“ არქივიდან
