ჩემი ოჯახის წევრებიც სხვა ვაქცინით აიცრნენ, არც ერთი არ დალოდებია „ფაიზერს“ – გაბუნია

საქართველოს ჯანდაცვის მინისტრის მოადგილემ, თამარ გაბუნიამ სატელევიზიო ეთერში „ფაიზერის“ ვაქცინის შემოტანის საკითხზე ისაუბრა. მინისტრის მოადგილემ აღნიშნა, რომ ეპიდსიტუაციიდან გამომდინარე მოსახლეობამ საკუთარ თავს არ უნდა მისცეს დალოდების უფლება.

„ყოველი დღე, თითოეული დაკარგული დღე, უკვე უტოლდება ადამიანურ დანაკარგს“ – განაცხადა თამარ გაბუნიამ.

„ფაიზერის მოწოდება დაიწყო მცირე დოზებით. ჩვენ ვიცით, რომ გასულ კვირაში შემოვიდა გარკვეული რაოდენობა. დიდი დოზების მოწოდებას ჩვენ ძალიან მალე ველოდებით.

მაგრამ დღეს აუცრელი ყველა ადამიანი, რა თქმა უნდა, თავის თავს აყენებს რისკის ქვეშ და რისკის ქვეშ აყენებს თავის გარემოცვას, იმიტომ, რომ ის ვაქცინები, რომლებიც ჩვენ დღეს გვაქვს ხელმისაწვდომი, ბევრ ქვეყანაში უკვე გამოყენებულია და დადასტურებულია მათი ეფექტურობა.

ჩვენთვის დღეს ყველაზე მნიშვნელოვანი ის კი არ არის, რომ ინფექციის გადაცემა სრულად აღიკვეთოს, ჩვენთვის დღეს ყველაზე მნიშვნელოვანია ის, რომ თუ ადამიანი გახდა ავად, შემთხვევა იყოს მსუბუქად მიმდინარე და არ დადგეს ლეტალური გამოსავალი, ანუ ავიცილოთ თავიდან ადამიანური დანაკარგი. ამდენად, მოცდის საშუალება და უფლება არ უნდა მივცეთ საკუთარ თავს. ჩემი ოჯახის წევრებიც, ყველა, სხვა ვაქცინით აიცრნენ, არც ერთი არ დალოდებია „ფაიზერს“.

„ფაიზერი“ ძალიან კარგი ვაქცინაა, შემოვა, გვექნება მისი გამოყენების საშუალება, მაგრამ მანამდეც ყველა დღე არის ძალიან მნიშვნელოვანი იმისთვის, რომ აქტიურად, თითოეული მოქალაქე ჩაერთოს ვაქცინაციის პროცესში.

მე ვფიქრობ, სულ რამდენიმე დღე დაგვჭირდება იმისთვის, რომ უკვე ფართომასშტაბიანი ვაქცინაციის კამპანია და რეგისტრაციის შესაძლებლობაც გაიხსნას „ფაიზერთან“ მიმართებაში, მაგრამ სხვა, დანარჩენი ვაქცინები, რაც გვაქვს, ძალიან ეფექტურია და ჩემი თხოვნა იქნება მოქალაქეებთან, რომ მეტად აქტიურად ჩაერთონ და ბიზნესი განსაკუთრებით, აცრან თავიანთი დასაქმებულები, ხელი შეუწყონ, თორემ გადაწყვეტილება, რა თქმა უნდა, თითოეული მოქალაქის მხარეს არის და ნებაყოფლობითია ეს პროცესი” – თქვა მან.