დღეს, 15 ივლისს, ჯანდაცვის მინისტრის მოადგილემ თამარ გაბუნიამ სატელევიზიო ეთერში საუბრისას აღნიშნა, რომ ეპიდსიტუაციის გაუარესებასთან ერთად, ისინი გასართობი ღონისძიებების შეზღუდვასაც განიხილავენ.
„ეპიდემიური სიტუაცია უარესდება. ბოლო ერთი კვირაა ახალი შემთხვევების მაჩვენებელი რჩება 1000-ს ზემოთ, რაც მიუთითებს იმაზე, რომ ინფექცია ვრცელდება და ძალიან აქტიურად თუ არ ჩავერიეთ, ეს გავრცელება კიდევ უფრო მეტი იქნება“, – განაცხადა თამარ გაბუნიამ.
გაბუნიამ თქვა, რომ აქტიური ჩარევის რესურსი პირველ რიგში ვაქცინაციას უკავშირდება, კერძოდ, მომდევნო რამდენიმე კვირის განმავლობაში ძალიან სწრაფად უნდა მოხდეს მოქალაქეების კრიტიკული რაოდენობის აცრა.
„მეორე, ეს უკვე არის პირადი დაცვის საშუალებები.
3 მილიონი მოქალაქის ინდივიდუალურ დონეზე კონტროლი და ამას ემატება ტურისტები, რომლებიც ქვეყანაში ჩამოვიდნენ – რა თქმა უნდა, სამინისტროს დონეზე შეუძლებელია. ჩვენ პირველი დღიდან ვსაუბრობდით, რომ კი, არის რეგულაცია, არის შეზღუდვები, მაგრამ მაინც, ინდივიდუალური პასუხისმგებლობა კრიტიკულია და ამდენად, აქ მოქალაქეებისა და საზოგადოების აქტივობის გარეშე წარმოუდგენელია.
მე მესმის, ზაფხულის პერიოდია, კურორტები გაიხსნა, გასართობი ღონისძიებები ტარდება… ახლა გასართობ ღონისძიებაზე არ არის ადამიანი განწყობილი იმისთვის, რომ ნიღბით იყოს იქ და დისტანცია დაიცვას, მაგრამ ეს ასე არ გამოვა. ჩვენ მოგვიწევს ისევ, რომ ვისაუბროთ ამ გასართობი ღონისძიებების შეზღუდვაზე და ამაზე დავიწყეთ უკვე ფიქრი” – ამბობს თამარ გაბუნია.
შეზღუდვების საჭიროება დღევანდელი სატელევიზიო გამოსვლისას ჯანდაცვის მინისტრმა ეკატერინე ტიკარაძემაც ახსენა. „დღევანდელი ინფექციის გავრცელება ჩვენ მიგვითითებს, რომ მნიშვნელოვანია დავიწყოთ მსჯელობა შეზღუდვებზე, რათა არ მივიღოთ ის ეფექტი, რაც გვქონდა შარშან” – თქვა მან.
