„ქართული ოცნების“ ხელმძღვანელი ირაკლი კობახიძე ამბობს, რომ საპროტესტო აქციების უკან რადიკალური, ანტიქრისტიანული ჯგუფები დგანან.
„ეს არის ყველანაირი წითელი ხაზების გადაკვეთა, ისინი მიიღებენ პოლიტიკურ პასუხს ყველანაირ ამორალურ ქმედებაზე. გარდაცვლილი ჟურნალისტის სიკვდილზე პოლიტიკური ქულების ჩაწერა, საქართველოში უნდა დაისაჯოს პოლიტიკურად უმკაცრესად. ამის საშუალება მომავალში არავის არ უნდა ჰქონდეს და არც უნდა გაიფიქრონ.
ჯერ გარდაცვლილ ბაჩალიაშვილზე თვეები იწერდნენ ქულებს, შაქარაშვილის საქმეზე გახსოვთ რა ხდებოდა, ეხლა გარდაცვლილი ჟურნალისტის სიკვდილზე ცდილობენ ქულების ჩაწერას. ამაზე მეტი მორალური ფსკერი ხომ არ არსებობს.
ეს არის ნაცმოძრაობა, მისი მედიამენეჯერებით ეგრეთ წოდებული ჭუტა, ნოდარი, გვარამია, მათ მორალურ ფსკერს არანაირი ახსნა და გამართლება არ აქვს“, – ამბობს ირაკლი კობახიძე.
კობახიძე რადიკალებს უწოდებს საზოგადოების ნაწილს, რომელიც ღარიბაშვილის გადადგომას ითხოვს. „ორგანიზატორები ამ გუშინდელი მიტინგის იყვნენ რადიკალური, ანტიქრისტიანული დაჯგუფებების ლიდერები, მიზანი არის დაუპირისპირდნენ სახელმწიფოს, ეკლესიას“, – ამბობს კობახიძე.
კობახიძის თქმით, კითხვები ირაკლი ღარიბაშვილის გადადგომასთან დაკავშირებით არასერიოზულია.
