მთავარი,სიახლეები

მუსლიმი აქტივისტები პოლიციას: უზრუნველყავით ლგბტქ+ ჯგუფის გამოხატვის თავისუფლება

05.07.2021 • 2238
მუსლიმი აქტივისტები პოლიციას: უზრუნველყავით ლგბტქ+ ჯგუფის გამოხატვის თავისუფლება

დღეს, 5 ივლისს, თბილისში „ღირსების მარშია“ დაგეგმილი, თუმცა ამ დრომდე რუსთაველის გამზირზე საპატრიარქოს მიერ ორგანიზებულ აქციაზე ჰომოფობიური და ძალადობრივი ჯგუფის წევრები არიან შეკრებილნი, რომლებიც სიტყვიერ და ფიზიკურ შეურაცხყოფას აყენებენ ჟურნალისტებს, აზიანებენ მედიასაშუალებების ტექნიკას და არბევენ პარლამენტის წინ გაშლილ კარვებს.

ჰომოფობიური ჯგუფები შეიჭრნენ „სირცხვილიას“ და „თბილისი პრაიდის“ ოფისში.

მუსლიმი აქტივისტები თბილისში განვითარებულ მოვლენებს ეხმიანებიან. მათ განცხადებას გთავაზობთ უცვლელად:

მუსლიმი აქტივისტები ეხმიანებიან “თბილისი პრაიდის” გარშემო განვითარებულ მოვლენებს და ემიჯნებიან სრულიად საქართველოს მუსლიმთა სამმართველოს მიერ გაკეთებულ განცხადებას. ჩვენ, ახალგაზრდა მუსლიმი აქტივისტები, ვემიჯნებით სრულიად საქართველოს მუსლიმთა სამმათველოს განცხადებას და ვთვლით, რომ მათი აღნიშნული დამოკიდებულება არ გამოხატავს საქართველოს მუსლიმი თემის საერთო პოზიციას და იგი არ უნდა იყოს გამოყენებული, როგორც პოლიტიკური არგუმენტი დისკრიმინაციის და დევნის ლეგიტიმაციისათვის.

მუსლიმი აქტივისტები ვთვლით, რომ კონსტიტუცია უნდა იყოს მთავარი გარანტი თანაბრად უზრუნველყოს თითოეული მოქალაქის გამოხატვის თავისუფლება, მშვიდობიანი შეკრების მონაწილეთა უსაფრთხოების დაცვა და შექმნას თანასწორი და სამართლიანი გარემო.

მუსლიმი აქტივისტები:

  • მოვუწოდებთ სამართალდამცავ ორგანოებს უზრუნველყონ ლგბტქ+ ჯგუფის გამოხატვის თავისუფლების კონსტიტუციური უფლება, რადგან მათი შესაძლო გულგრილობა, პირველ რიგში გააღრმავებს მოსახლეობაში პოლიციისა და საქართველოს ხელისუფლების მიმართ უნდობლობას, ამასთანავე, გამოიწვევს დაპირისპირების წახალისებას.
  • მოსახლეობას მოვუწოდებთ გამოიჩინონ მშვიდობიანი შეკრების მონაწილეთა მიმართ პატივისცემა და შეინარჩუნონ მშვიდობა, არ აჰყვნენ პროვოკაციებს, თავი შეიკავონ ისეთ ქმედებისაგან, რომელმაც შესაძლოა დაძაბოს სიტუაცია და გამოიწვიოს დაპირისპირება
  • მოვუწოდებთ რელიგიურ ორგანიზაციებს არ იყვნენ ძალადობისა და დევნის წამახალისებელნი, პირიქით, მათ შეასრულონ მშვიდობის შენებაში პოზიტიური როლი.

განცხადებას ხელს აწერენ: ლუიზა მუთოშვილი, სამირა ბაირამოვა, ელნურ ალისოი, ქამრან მამედლი, მაია რიჟვაძე, ლია დეკანაძე, ლელა დეკანაძე, ნესტან ანანიძე, ზაზა მიქელაძე, ზაურ ხალილოვი, რუსლან ომაროვი, იმრან სულეიმანოვი, რაბილ ისმაილი, სემა სადიკი, აითაჯ ხალილლი, შენაი სადიკი, რაჰიბ სეიდლი, ელდარ ჯავახიძე, ავთანდილ შავაძე, ჰურიე აბაშიძე, რამზან გორგიშვილი, ოქტაი ქაზუმოვი, აიჰან გასანოვი, თოზუ გულმამედლი არის ასკერლი.

___

ჰომოფობების ჯგუფები განსაკუთრებული აგრესიით ჟურნალისტების მიმართ გამოირჩევიან. ბოლო ინფორმაციით, მათი  თავდასხმის სამიზნე, სულ მცირე, 10 ჟურნალისტი და ოპერატორი გახდა, თუმცა ეს რაოდენობა, შეიძლება შეიცვალოს. დაზიანებულია მათი ტექნიკაც. გავრცელდა კადრებიც, სადაც ჩანს, როგორ ეჯახება პირი ჟურნალისტებს მოპედით.

სანამ მედიაზე იძალადებდნენ , ჰომოფობიურმა ჯგუფებმა დაარბიეს “ქართული ოცნების” მოწინააღმდეგეთა კარვები პარლამენტის წინ.

გადაბეჭდვის წესი


ასევე: