Batumelebi | მთავრობის გამოხმაურება ჩაქვში 4 ჰექტარი პლაჟის გასხვისებაზე მთავრობის გამოხმაურება ჩაქვში 4 ჰექტარი პლაჟის გასხვისებაზე – Batumelebi
RU | GE  

მთავრობის გამოხმაურება ჩაქვში 4 ჰექტარი პლაჟის გასხვისებაზე

აჭარის მთავრობა გამოეხმაურა batumelebi.ge -ზე 29 მაისს გამოქვეყნებულ სტატიას, რომელიც ჩაქვის ყოფილი ტურბაზის ტერიტორიის გასხვისებას ეხებოდა. ჩვენ ვწერდით იმის შესახებ, რომ ამ ტერიტორიის მიყიდვა კონკრეტული კომპანიისთვის იგეგმებოდა, რომლის მფლობელებიც რუსეთის მოქალაქეები არიან. სტატია ბათუმის მერიის განკარგულების პროექტისა და მასზე თანდართული განმარტებითი ბარათის მიხედვით მოვამზადეთ.

სტატიის გამოქვეყნების შემდეგ აჭარის მთავრობამ წერილობით გვაცნობა, რომ მცდარია ინფორმაცია ჩაქვის ყოფილი ტურბაზის ტერიტორიის კონკრეტული ინვესტორისთვის მიყიდვის შესახებ. მთავრობის განმარტებით, არც „ბათუმელების“ მიერ გამოქვეყნებული სტატიის შემდეგი აბზაცი შეესაბამება სინამდვილეს: „აჭარის მთავრობის თავმჯდომარემ, თორნიკე რიჟვაძემ ბათუმის მერიას ოფიციალურად მისწერა, რომ ჩაქვის პლაჟის ტერიტორიას, მიმდებარე ნაკვეთთან ერთად მეზღვაურთა ქუჩაზე, #20/22-ში და ასევე ბათუმის ქუჩაზე #50-ში, შპს „აჭარა რიზორთ დეველოპმენტ კომპანისთვის“ ამზადებენ”.

„ბათუმელებმა“ ჩაქვის ყოფილი ტურბაზის შესაძლო გასხვისების და ერთი კონკრეტული კომპანიის ინტერესების შესახებ მასალა ბათუმის მერიის მიერ მომზადებულ ოფიციალურ დოკუმენტებზე – განმარტებით ბარათზე დაყრდნობით მოამზადა. სწორედ ამ დოკუმენტშია ნახსენები როგორც აჭარის მთავრობის თავმჯდომარის წერილი, ასევე “აჭარა რიზორთ დეველოპმენტ კომპანი”.

ნახეთ, რა წერია საკრებულოს სხდომაზე დასამტკიცებლად გადაგზავნილ განმარტებით ბარათში:

ამონარიდი ბათუმის საკრებულოს განმარტებითი ბარათიდან.

თორნიკე რიჟვაძემ სინამდვილეში რა მისწერა ბათუმის მერიას, ეს „ბათუმელებისთვის“ არ არის ცნობილი, რადგან მთავრობის თავმჯდომარის წერილი განკარგულების პროექტს თან არ ერთვის.

მთავრობიდან მიღებული წერილობითი განმარტების მიხედვით კი, „მთავრობა ითხოვს მხოლოდ მიწის ნაკვეთის გადმოცემას შემდეგში განკარგვის მიზნით. შეუძლებელია მთავრობამ იცოდეს, რამდენი ინვესტორი დაინტერესდება ტერიტორიაზე ინვესტიციის განხორციელებით და კონკრეტულად ვინ გაიმარჯვებს თავისუფალ და გამჭვირვალე ელექტრონულ აუქციონში.

მთავრობას არ მიუწერია ბათუმის მერიისთვის, რომ რაიმე ტიპის მიწის ნაკვეთს “აჭარა რიზორთ დეველოპმენტ კომპანისთვის” ამზადებენ და არც საკრებულოს განკარგულებაშია მსგავსი ინფორმაცია. ნახსენებიც კი არ არის, რომ რაიმე მიწის ვინმესთვის პირდაპირი მიყიდვის ფორმით გასხვისება იგეგმება.“

მთავრობის მიერ „ბათუმელებისთვის“ გამოგზავნილი წერილობითი განმარტებით, ამ მიწის ნაკვეთის გასხვისებას აპირებენ არა „აჭარა რიზორთ დეველოპმენტ კომპანიზე“, რომელიც რუსეთის მოქალაქეებს ეკუთვნით, არამედ აუქციონის წესით.

კიდევ ერთი ამონარიდი მთავრობის წერილიდან: „რეალურად აღნიშნული მიწის ნაკვთების მომიჯნავედ აჭარის საკუთრებაში არსებული ნაკვეთი მდებარეობს, ოპტიმალურია ერთ ლოტად განკარვა, 2020 წელს ცნობილი საერთაშორისო კომპანია “ქოლიერს ინთერნეიშენელის” მიერ მომზადდა კვლევა და სწორედ ამ კვლევის საფუძველზე მიმდინარეობის ქონების გადმოცემის პროცედურები. რის შემდეგაც, კანონით დადგენილი წესით, ელექტრონული აუქციონი გამოცხადდება მთლიან ლოტზე“.

ბათუმის საკრებულო ჩაქვში 4 ჰექტარი მიწის ნაკვეთის აჭარის მთავრობისთვის გადაცემაზე ხვალ, 31 მაისს იმსჯელებს. პროექტი უკვე განიხილეს საკრებულოს კომისიებმა, ბიურომ და ის მომავალი სხდომის დღის წესრიგში ჩასვეს. სხდომა ხვალ, 31 მაისს უნდა გაიმართოს. აქამდე არსებული პრაქტიკით, როცა მუნიციპალური ქონებით ინვესტორი ინტერესდება, ის ძირითადად მთავრობასთან აწარმოებს მოლაპარაკებებს, მუნიციპალური ქონების გასხვისება კი საკრებულოს თანხმობას მოითხოვს.

ამავე თემაზე:

მთავრობა ჩაქვის პლაჟზე 4 ჰექტარი მიწის გასხვისებას აპირებს

ნეტგაზეთის მასალების სხვა გამოცემებში გადაბეჭდვის წესი
ავტორი