მთავრობა ჩაქვის პლაჟზე 4 ჰექტარი მიწის გასხვისებას აპირებს

ბათუმის მერია ჩაქვის პლაჟზე 4 ჰექტარამდე ტერიტორიას აჭარის მთავრობას საკუთრებაში გადასცემს, მისი შემდგომში ინვესტორზე გადაცემის მიზნით. როგორც განკარგულების პროექტის განმარტებით ბარათშია ნათქვამი, აჭარის მთავრობის თავმჯდომარემ, თორნიკე რიჟვაძემ ბათუმის მერიას ოფიციალურად მიწერა, რომ ჩაქვის პლაჟის ტერიტორიას, მიმდებარე ნაკვეთთან ერთად მეზღვაურთა ქუჩაზე, #20/22-ში და ასევე ბათუმის ქუჩაზე #50-ში, საინვესტიციოდ ამზადებენ.

ეს წერილი მერიაში 21 მაისს მიიღეს. ის უკვე განიხილეს, მოამზადეს შესაბამისი განკარგულების პროექტი და საკრებულოს გადაუგზავნეს დასამტკიცებლად. საკრებულო ამ საკითხს 31 მაისს ჩანიშნულ სხდომაზე განიხილავს.

განკარგულების პროექტის განმარტებითი ბარათის მიხედვით, კომპანია ჩაქვში ყოფილი ტურბაზის ტერიტორიაზე 250 მილიონი ლარის ინვესტიციის განხორციელებას გეგმავს.

პროექტის ფარგლებში დაგეგმილია ხუთვარსკვლავიანი სასტუმროს მშენებლობა, ასევე უნდა გაკეთდეს ზღვისპირა ბულვარი – სანაპირო ზოლის ინფრასტრუქტურა, აპარტამენტები, ბავშვთა გასართობი სივრცეები, სპორტული ზონა, ღამის კლუბი, რესტორნები, ღია და დახურულ აუზები.

განმარტებითი ბარათით ირკვევა ასევე, რომ ჩაქვის ყოფილი ტურბაზის ტერიტორიაზე ინვესტიციის განხორციელებასთან დაკავშირებული მოლაპარაკებები 2019 წელს დაიწყო. შემდეგ კი ქონების ეროვნულმა სააგენტომ ეს ნაკვეთები საკუთრებაში ბათუმს გადმოსცა. მუნიციპალიტეტმა თავის მხრივ ქონება უნდა გადასცეს აჭარის მთავრობას უსასყიდლოდ, მთავრობა კი მას ინვესტორზე გაასხვისებს.

საჯარო რეესტრის მონაცემებით, კომპანია „აჭარა რიზორთს დეველოპმენტ კომპანი“ 2019 წელს გიორგი ბოლქვაძემ დააფუძნა. მალევე მან კომპანია რუსეთის ორ მოქალაქეზე გადააფორმა, თვითონ კი კომპანიის დირექტორის პოზიციას დღემდე იკავებს.

შესაბამისად, კომპანიის 50 პროცენტი რუსეთის მოქალაქეს, მარინა დავიდოვას ეკუთვნის, 50 პროცენტი კი – ორმაგი მოქალაქეობის მქონე ნათია მურვანიძეს.

შპს „აჭარა რიზორთს დეველოპმენტ კომპანი“ ფლობს ასევე 2019 წელს პირობიანი აუქციონის წესით შეძენილ მიწის ნაკვეთს გოდერძის უღელტეხილზე. აქ 4136 კვ. მეტრი მიწის ნაკვეთი და მასზე დამაგრებული შენობა-ნაგებობა პირობიანი აუქციონით კომპანიამ დარეგისტრირებიდან ერთ თვეში შეისყიდა, მიწის ნაკვეთში 331 000 ლარი გადაიხადა და მასზე 1 მილიონ 500 000 ლარის ღირებულების ინვესტიციის განხორციელების ვალდებულება აიღო.

შენიშვნა: სტატიის თავდაპირველი სათაური იყო „მთავრობა აპირებს რუსეთის მოქალაქეებს ჩაქვის პლაჟზე 4 ჰექტარი მიწა მიყიდოს“. სტატია მომზადდა ბათუმის საკრებულოს განმარტებით ბარათზე დაყრდნობით, რომლის მიხედვითაც ჩანს, რომ 4 ჰექტარ ტერიტორიას ჩაქვში კონკრეტული კომპანიისთვის გადასაცემად ამზადებენ. სტატიის გამოქვეყნების შემდეგ „ბათუმელებს“ დაუკავშირდნენ აჭარის მთავრობიდან. მთავრობის განმარტებით, ჩაქვში 4 ჰექტარ მიწის კონკრეტულ ინვესტორზე გადაცემა არ იგეგმება და ამ ქონებას აუქციონის წესით გაასხვისებენ.

___

ამავე თემაზე: 

მთავრობის გამოხმაურება ჩაქვში 4 ჰექტარი პლაჟის გასხვისებაზე