Batumelebi | უნდა გვეშინოდეს თუ არა კორონავირუსის ინდური შტამის უნდა გვეშინოდეს თუ არა კორონავირუსის ინდური შტამის – Batumelebi
RU | GE  

უნდა გვეშინოდეს თუ არა კორონავირუსის ინდური შტამის

ბათუმში სასტუმრო „ჰილტონში“ შეხვედრის დროს, ალერგოლოგმა ბიძინა კულუმბეგოვმა კორონავირუსის ინდურ შტამთან დაკავშირებით დასმულ შეკითხვებს უპასუხა.

რატომ გვეშინია კორონავირუსის მუტაციების? –  ბიძინა კულუმბეგოვის თქმით, პირველ რიგში იმიტომ, რომ ჩნდება კითხვა, იქნება თუ არა ეს შტამი ადვილად გავრცელებადი, იქნება თუ არა უფრო მძიმე დაავადების გამომწვევი და უფრო მეტად დამაზიანებელი ჩვენი ორგანიზმისთვის და ხომ არ შეუშლის ხელს არსებული ვაქცინების მოქმედებას?

„გამომდინარე იქედან, რა ინფორმაციასაც დღეს ვფლობთ, ინდური ვარიანტი, რომელშიც სამხრეთ აფრიკული და ბრაზილიური შტამების ცვლილებებია ერთად ასახული,  აჩვენებს რომ 15-იდან 50 პროცენტამდე უფრო მეტად გადამდებია ვიდრე საწყისი შტამი. დაახლოებით იგივე ფარგლებშია, რაც ბრიტანული შტამი, რომელიც დომინანტურია ჩვენთან. შესაბამისად, არაფერი აქ გადაცემის სიხშირის და სისწრაფის თვალსაზრისით არაფერი შეცვლილა.

დაავადების სიმძიმეზე შეგვიძლია ვთქვათ, რომ ჯერჯერობით არავითარი მინიშნება იმისა, რომ ინდური ვარიანტი იწვევს უფრო მძიმე დაავადებას ან ხანგრძლივ ავადობას, არ არსებობს. შესაბამისად, ამ მხრივ, შეშფოთების საფუძველი არ გვაქვს“-ამბობს კულუმბეგოვი.

რაც შეეხება იმას, მოქმედებს თუ არა ინდურ ვარიანტზე თანამედროვე კოვიდ 19-ის საწინააღმდეგო ვაქცინები, ბიძინა კულუმბეგოვი ამბობს, რომ დღეს არსებული ინფორმაციით,  ვაქცინების ეფექტურობა შემცირებულია, თუმცა ადამიანს დაავადების გართულებისგან იცავს.

„ფაიზერის“  ეფექტურობა შემცირებულია 94 პროცენტიდან 88 პროცენტამდე და „ასტრაზენეკასი“ 66-იდან 60 პროცენტამდე.  რაც შეეხება „სინოფარმსა“ და „სინოვაკს“  ჯერჯერობით ასეთი ტიპის კვლევა არ გვაქვს. შესაბამისად, არ შეგვიძლია ვამტკიცოთ ამცირებს თუ არა ვაქცინების ეფექტურობას.

ერთადერთი, ის ინფორმაცია გვაქვს, რომ „სინოფარმისა“ და „სინოვაკის“ ზუსტი ანალოგი ვაქცინა აქვს ინდოეთს, ეს არის „კოვაქსინი“,  რომელიც ასევე ინაქტივირებული ვირუსია და იგივე ტექნოლოგიითაა დამზადებული.  „კოვაქსინის“ კვლევამ აჩვენა შემცირებული ეფექტურობა ინდურ შტამთან მიმართებაშიც“-ამბობს ბიძინა კულუმბეგოვი.

მისი თქმით, სანამ  უფრო მეტი კვლევა გაჩნდება ვაქცინების ეფექტურობასთან დაკავშირებით, ყველას უნდა ჰქონდეს იმის იმედი, რომ ინაქტივირებული ვაქცინები „სინოფარმი“ და „სინოვაკი“  ადამიანს მძიმე დაავადებებისგან და კორონავირუსის სიკვდილისგან დაიცავს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com