ადგილობრივების ინფორმაციით, წუხელ რიონის ხეობაში, სოფელ გუმათში დაკავებული საპროტესტო აქციის მონაწილე რვავე პირი უკვე გაათავისუფლეს. მათი თქმით, დაკავებულების სასამართლო პროცესი ერთი კვირით გადაიდო.
წუხანდელი დაკავებების მიუხედავად, მთელი დღე რიონის ხეობის მცველებმა გუმათის დასახლების შესასვლელთან, კომპანია „ენკას“ ოფისთან გაატარეს. ისინი მობილიზებულები იყვნენ, რომ არ გაეტარებინათ კომპანიის სპეცტექნიკა, თუმცა მსგავსი ტექნიკა გუმათის დასახლებაში არ გამოჩენილა.
გუმათში განთავსებული „ენკა რინიუებლზის“ ოფისის ეზოში ბევრი პოლიციელი და სპეცრაზმელია მობილიზებული. დამატებითი ძალები ხეობაში სავარაუდოდ მეზობელი სამეგრელოს რეგიონიდან შეიყვანეს.
სოფელ გუმათთან, სადაც პოლიციას რკინის ბარიკადები აქვს აღმართული, ნამახვანჰესის მშენებლობის მოწინააღმდეგეებსა და პოლიციას შორის ურთიერთობა წუხელ დაიძაბა.
შეკრებილები პროტესტს რკინის ბარიკადებზე ხელის დარტყმით გამოხატავდნენ, რის გამოც პოლიცია ბარიკადების მეორე მხარეს გადავიდა და აქციის 8 მონაწილე დააკავა.
