Batumelebi | მწვანე კონცხი, კვარიათი, გონიო – ბათუმის მერიამ პლაჟების საფასური დაადგინა მწვანე კონცხი, კვარიათი, გონიო – ბათუმის მერიამ პლაჟების საფასური დაადგინა – Batumelebi
ნეტგაზეთი • RU

მწვანე კონცხი, კვარიათი, გონიო – ბათუმის მერიამ პლაჟების საფასური დაადგინა

როგორც კომპანიები, ასევე ფიზიკური პირები ბათუმის მერიისგან პლაჟების პირდაპირი განკარგვის წესით, არაკონკურენტულ გადაცემას ითხოვენ და ამის მიზეზად პანდემიას ასახელებენ.

როგორც შესაბამისი განკარგულების პროექტის განმარტებით ბარათში წერია, გადაწყვეტილების მიმღები პირები მიიჩნევენ, რომ პანდემიის პირობებში პლაჟების პირდაპირი წესით გასხვისება მიზანშეწონილია:

„მიზანშეწონილია გათვალისწინებული იქნას ახალი კორონავირუსის გავრცელებასთან დაკავშირებით გამოცხადებული პანდემიის ფონზე საქართველოში და მათ შორის აჭარის რეგიონში არსებული მძიმე ეკონომიკური გამოწვევები, ხელი შეუწყოს მოიჯარეებს, რათა მათ შეძლონ რთულ ეკონომიკურ მდგომარეობასთან გამკლავება და პირდაპირი განკარგვის წესით სასყიდლით, 2021 წლის 01 ნოემბრამდე ვადით სარგებლობაში გადაეცეთ პლაჟის მონაკვეთები, საპლაჟო ინფრასტრუქტურის [შეზლონგები] და მსუბუქი კონსტრუქციის მომსახურების ობიექტების განსათავსებლად.“

განკარგულების პროექტის მიხედვით, მერიამ განსაზღვრა ასევე 1 კვ.მეტრი პლაჟის გამოყენების წლიური საფასური, როგორც საპლაჟო ინფრასტრუქტურის განსათავსებლად, ასევე მსუბუქი კონსტრუქციის მოსაწყობად. ფასები კონკრეტული ადგილების მიხედვით განსხვავებულია.

პროექტის მიხედვით, კვარიათის პლაჟის ათვისების მსურველს ყველაზე მაღალი ფასის გადახდა მოუწევს.

მერიის მიერ დადგენილი ფასების მიხედვით, 100 კვ.მეტრი მსუბუქი კონსტრუქციის განთავსება, მაგალითად, ბუნგალოს მოსაწყობად, მთელი წლის განმავლობაში მოიჯარეს 6000 ლარი დაუჯდება, ხოლო იმავე ფართობზე შეზლონგების განთავსებისთვის 3000 ლარის გადახდა მოუწევს.

კომპანიები, რომლებიც სანაპიროს გასწვრივ აშენებენ, პლაჟებს ძირითადად გრძელვადიანი იჯარის წესით ითხოვენ. პლაჟზე სეზონურად მომუშავე მოიჯარეები კი ხშირად მანამდე იკავებენ ტერიტორიებს, ვიდრე მერია აუქციონს გამოაცხადებს. საკურორტო სეზონის გასვლის შემდეგ კი ამ კონსტრუქციებს პლაჟზე ტოვებენ და არც ტერიტორიის გასუფთავებით იწუხებენ თავს.

ეს ერთი შეხედვითაც კი ჩანს, მაგალითად, გონიოს სანაპიროზე, სადაც პლაჟზე კუსტარულად მოჭედილ ხის საპირფარეშოებსაც კი ნახავთ.

ჩაბეტონებული ჯიხური კვარიათის პლაჟზე

საპირფარეშო გონიოს პლაჟზე

ნეტგაზეთის მასალების სხვა გამოცემებში გადაბეჭდვის წესი
ავტორი