მთავარი,სიახლეები

„პირველივე დღიდან ჩვენ გვერდით არიან ძალიან განსხვავებული ადამიანები“ – მარიტა მუსელიანი

25.05.2021 • 2918
„პირველივე დღიდან ჩვენ გვერდით არიან ძალიან განსხვავებული ადამიანები“ – მარიტა მუსელიანი

დღეს, 25 მაისს, ნამახვანჰესის მშენებლობის საწინააღმდეგო აქციის ერთ-ერთი ლიდერი, მარიტა მუსელიანი თბილისში, საპროტესტო აქციაზე გამოსვლისას იმ ძალადობრივ შემთხვევებს გამოეხმაურა, რომლებიც აქციაზე მისულმა ულტრამემარჯვენე დაჯგუფების წევრებმა თბილისში გამართულ აქციებზე ჩაიდინეს.

საუბარია ნამახვანჰესის მოწინააღმდეგეთა აქციაზე წინა დღეებში მომხდარ ძალადობის ფაქტებზე, როცა მამა-შვილმა ფალავანდიშვილებმა ჯერ ქვიარსოლიდარობის გამომხატველი ბანერი გადატეხეს და მიაყენეს სიტყვიერი შეურაცხყოფა ადამიანებს, რომლებსაც ბანერი ეჭირათ. მეორე დღეს კი LGBT-სამკლაურიან აქციის მონაწილეს ჰესის საწინააღმდეგო აქციის დატოვება აიძულეს.

მარიტა მუსელიანმა აქციის მონაწილეებს ამ სიტყვებით მიმართა:

„ძალადობა საერთოდ მიუღებელია იმიტომ კი არა, რომ ასეთი გავრცელებული ფრაზაა ძალადობაზე, ასე მოდურია, მომგებიანი და ქულებს ვიწერთ ახლა ჩვენ ამით. „არა ძალადობას“ იმიტომ, რომ ეს მართალია, ასეა, მართლა არ შეიძლება ძალადობა და იმიტომ უნდა დავგმოთ ეს ჩვენ.

ძალადობა არავის მიმართ არ არის მისაღები, მისაღები კი არა დასაგმობია – მე ამის თქმა მინდა და ეს დაგმობა ჩვენგან უნდა იყოს აბსოლუტურად მკვეთრი, მთავრობისთვის და სოციალური ჯგუფებისთვის გასაგები ენით რომ ვილაპარაკოთ.

პირველივე დღიდან ჩვენ გვერდით არიან ძალიან განსხვავებული ადამიანები და მე მინდა დაგარწმუნოთ ყველანი, შემიძლია გითხრათ მთელი გულით და სულით, რომ არ მგონია თქვენ გყავდეთ იმდენი განსხვავებული ადამიანი ნანახი ამ ხნის მანძილზე, რამდენთანაც ჩვენ გვქონია შეხება.

ახლა რომ არ დავასახელო ჯგუფები და მით უმეტეს, პიროვნულად არ შევეხო ვინმეს, ეს არ მოხდება, მაგრამ ყველა მათგანის სასარგებლოდ მინდა ვთქვა, რომ არც ერთი ჯგუფისგან, არც ერთი პიროვნებისგან ვინც ჩვენთან მოდიოდა, ჩვენ მხარდაჭერის მეტი არაფერი გვინახავს და როდესაც მათ ვუხსნიდით და ჩვენ გვიწევდა ამის გაკეთება ცალკეულ შემთხვევებში, რომ ეს „ურთიერთვერატანა“ ჩვენი საზოგადოებისთვის არის დამღუპველი მოვლენა და ეს [დაპირისპირების არსებობა] არის ის, რასაც ეყრდნობა ჩვენი მოწინააღმდეგე და ყოველ წუთში იყენებს ამას, როგორც კი შესაძლებლად ჩათვლიან, არის ჩვენთვის თავიდანვე, შინაგანად და მდგომარეობით მიუღებელი.

ამიტომ მე პირადად ნებისმიერ ადამიანთან  მაქვს გახსნილი ურთიერთობა, ნებისმიერ მათგანთან მილაპარაკია ჩემი პირადი პრობლემების შესახებ და ნებისმიერ მათგანთან  მქონია გულითადი ურთიერთობა და მათგანაც ვგრძნობ ზუსტად იმავეს.

ახლა კიდევ განვმეორდე შეიძლება, არავის ჩვენს ურთიერთობებში ჩარევის უფლება არა აქვს, მაგრამ ვერც იმას ვიზამთ, რომ საზოგადოების რომელიმე ჯგუფს მივაკეროთ, მაგალითად, ძალადობრივი ჯგუფის იარლიყი, ამიტომ ჩვენ მოვუწოდებთ ყველა მხარეს, ნურავინ ნუ იძალადებს, იმიტომ, რომ ძალადობა არ შეიძლება და ნურავინ ნუ მისცემს ამ ძალადობის საფუძველს. გთხოვთ, რომ გავითვალისწინოთ და დავზოგოთ ერთმანეთი და ეს ყველაფერი სიყვარულით გავაკეთოთ“.

 

__

ამავე თემაზე: 

ხვალ დავბრუნდებით რიონის ხეობაში, რათა ადგილზე შევუშალოთ ხელი მშენებლობას – გოლეთიანი

გადაბეჭდვის წესი


ასევე: