Batumelebi | რა წერია ჯანმოს ექსპერტების რეკომენდაციებში ჩინური სინოფარმის შესახებ რა წერია ჯანმოს ექსპერტების რეკომენდაციებში ჩინური სინოფარმის შესახებ – Batumelebi
RU | GE  

რა წერია ჯანმოს ექსპერტების რეკომენდაციებში ჩინური სინოფარმის შესახებ

ჯანდაცვის მსოფლიო ორგანიზაციის სტრატეგიული საკონსულტაციო ექსპერტთა ჯგუფმა (SAGE) ჩინურ ვაქცინა “სინოფარმთან” დაკავშირებით ეფექტიანობისა და უსაფრთხოების შესახებ მტკიცებულებათა შეფასება გამოაქვეყნა. Sinopharm/BBIBP -ს დოკუმენტაცია მსოფლიო ჯანდაცვის ორგანიზაციაში 29 აპრილს დახურულ შეხვედრაზე განიხილეს, ექსპერტების შეფასება კი 3 მაისს, საღამოს გახდა ცნობილი.

ამ დოკუმენტის მიხედვით, სხვადასხვა ქვეყანაში მესამე ფაზის კლინიკური კვლევის მონაცემებით Sinopharm/BBIBP-ის ეფექტიანობა 78.1 %-ია 18-59 ასაკობრივ ჯგუფში.

ექსპერტთა ჯგუფი:

  • დარწმუნებულია, რომ BBIBP-CorV– ის ორი დოზა ეფექტიანია მოზრდილებში (18-59 ასაკობრივ ჯგუფში) COVID– 19 პრევენციის თვალსაზრისით.
  • ზომიერად დარწმუნებულა, რომ მოზრდილებში (18-59 ასაკობრივ ჯგუფში) სერიოზული გვერდითი მოვლენების რისკი BBIBP-CorV ერთი ან ორი დოზის დროს დაბალია.
  • არაა დარწმუნებული, რომ ვაქცინა ეფექტურია კორონავირუსის პრევენციისთვის 60 და ზემოთ ასაკის მოქალაქეებში.
  • არ ენდობა მტკიცებულებებს, რომ ვაქცინის ორი დოზა ეფექტურია PCR– ით დადასტურებული COVID-19 პრევენციისთვის თანმხლები დაავადებების მქონე პაციენტებში.

შეფასებაში ასევე წერია, რომ სინოფარმის ვაქცინით აცრისას გვერდითი მოვლენების უმრავლესობა იყო სუსტი ან საშუალო: ყველაზე ხშირი გვერდითი ეფექტი იყო ტკივილი ინექციის არეში, თავის ტკივილი და დაღლილობა.

სინოფარმის კვლევაში მონაწილეობა მიიღო 13,765–მა ადამიანმა, ორ შემთხვევაში გამოვლინდა სერიოზული გვერდითი მოვლენა, რომელიც შესაძლოა უკავშირდებოდეს აცრას (ძლიერი გულისრევა და ანთებითი დემიელინიზაციის სინდრომი). ყველა მწვავე ალერგიული რეაქცია BBIBP-CorV ჯგუფში იყო 1 და 2 ხარისხის, ანაფილაქსია არ დაფიქსირებულა.

დოკუმენტის მიხედვით, ექსპერტთა ჯგუფს მტკიცებულებები აკლია საიმისოდ, რომ ზუსტად დადგინდეს, როგორი დაცვა აქვს სინოფარმის ვაქცინას კოვიდის მძიმე მიმდინარეობისას; როგორია დაცვის ხანგრძლივობა, საჭიროა თუ არა დამატებითი (ე.წ. ბუსტერი) დოზა; როგორი დაცვა აქვს კოვიდის იმ ვარიანტებისგან, რომლებიც ბოლო დროს შეშფოთების საგანი გახდა მსოფლიოში; რამდენად უსაფრთხოა ორსულების შემთხვევაში; რამდენად უსაფრთხოა და როგორი კლინიკური დაცვა აქვს ხანდაზმულ ადამიანებში, ქრონიკული დაავადების მქონე ადამიანებსა და სხვა ქვეჯგუფებში;

ჯანმო სინოფარმის ვაქცინის ავტორიზაციის შესახებ დასკვნას, მათივე განცხადებით, მიმდინარე კვირაში გამოაქვეყნებს.

ამავე თემაზე: ყველაფერი, რაც ამ დრომდე ვიცით “სინოფარმის” ვაქცინაზე

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან