Batumelebi | „ისევ გავიქცევი“ – რას ჰყვება კაცი, რომელსაც ქუჩაში პოლიციელი გაეკიდა „ისევ გავიქცევი“ – რას ჰყვება კაცი, რომელსაც ქუჩაში პოლიციელი გაეკიდა – Batumelebi
RU | GE  

„ისევ გავიქცევი“ – რას ჰყვება კაცი, რომელსაც ქუჩაში პოლიციელი გაეკიდა

„როგორც ვიცი, უფორმოდ პოლიციელებს ჩემთან მოსვლის უფლება არ აქვთ და ფორმით როცა დავინახავ, ისევ გავიქცევი,“ – გვითხრა ლაშა ხიმშიაშვილმა. ეს ის მოქალაქეა, რომელსაც ორი დღის წინ ბათუმში, ბარათაშვილის ქუჩაზე პირბადის გამო პოლიციელი გაეკიდა.

სანამ პოლიციელი გაეკიდებოდა, ლაშა ხიმშიაშვილმა მას უთხრა, რომ თავადაც არასწორად უკეთია პირბადე. პოლიციელს მართლა არ ჰქონდა პირბადით ცხვირი დაფარული.

ვიდეო, რომელზეც ლაშა ხიმშიაშვილის გაქცევა და პოლიციელის დადევნება იყო ასახული, 26 აპრილს ფეისბუქში ვირუსულად გავრცელდა.

დღეს, 28 აპრილს, ლაშა ხიმშიაშვილი „ბათუმელებთან“ ამბობს, რომ მას ამ შემთხვევის შემდეგ უშუალოდ დაუკავშირდა აჭარის საპატრულო პოლიციის უფროსის მოადგილე და სთხოვა განყოფილებაში მისვლა, თუმცა ის პოლიციაში მისვლას არ აპირებს.

„მითხრა, რომ დამაჯარიმებენ მხოლოდ 20 ლარით პირბადის არქონის გამო და 1000 ლარით – პოლიციელის კანონიერი მოთხოვნის დაუმორჩილებლობისთვის. ეს ყველაზე მინიმალური ჯარიმააო, ასე მითხრა, მაგრამ მე არ ვარ დარწმუნებული, შესაძლოა, რამდენიმე დღე პატიმრობაშიც დამტოვონ… გავარკვიე იურისტებთან, რომ ორ თვეში ეს ქარწყლდება, ორი თვის შემდეგ ვეღარ მომთხოვენ პასუხს. შესაბამისად, იქ მისვლას არ ვაპირებ,“ – ამბობს ლაშა ხიმშიაშვილი.

ლაშა ხიმშიაშვილის თქმით, ის უმუშევარია და ამ ჯარიმას ვერ გადაიხდის.

მოქალაქე ყურადღებას ამახვილებს იმაზეც, რომ ხშირად პოლიციელებსაც არ უკეთიათ ქუჩაში პირბადე ან ის არასწორად უკეთიათ.

ლაშა ხიმშიაშვილი 28 წლისაა და ბათუმში ცხოვრობს.

___

მთავარი ფოტო: კადრი „რადიო თავისუფლების“ მიერ გავრცელებული ვიდეოდან

ნეტგაზეთის მასალების სხვა გამოცემებში გადაბეჭდვის წესი
ავტორი