განათლების სამინისტრო აცხადებს, რომ კონკურსის საფუძველზე შეარჩია 28 სოციალური მუშაკი, რომლებიც მანდატურის სამსახურის ფსიქო-სოციალური მომსახურების ცენტრებში განთავსდებიან და მოსწავლეებსა და მათ მშობლებს შესაბამის სოციალურ მომსახურებას გაუწევენ.
შერჩეული სოციალური მუშაკები თბილისის, კახეთის, ქვემო ქართლის, აჭარა-გურიის, იმერეთისა და რაჭა-ლეჩხუმის ოფისებში აპრილიდან განაწილდებიან.
სამინისტრო ამბობს, რომ დამატებით კიდეც აპირებს 22 სოციალური მუშაკის შერჩევას და ამის შემდეგ ყველა რეგიონის ცენტრს ეყოლება სოციალური მუშაკი.
სამინისტრო მიიჩნევს, რომ ამით სკოლებში სახელმწიფო ზრუნვის კომპონენტი გაძლიერდება.
„სისტემაში სოციალური მუშაკების ინტეგრირება შეამცირებს და აღმოფხვრის საგანმანათლებლო პროცესებში ბავშვების ეფექტიანი ჩართულობისთვის ხელისშემშლელ ფაქტორებს. ისინი აქტიურად ჩაერთვებიან მოზარდების მშობლებთან, მეურვეებთან ან კანონიერ წარმომადგენლებთან კომუნიკაციის პროცესში.
კერძოდ, სოციალური მუშაკები საკუთარი უფლებამოსილების ფარგლებში, ცნობიერების ასამაღლებლად, სკოლებსა და ოჯახებში, ბავშვებთან, მათ მშობლებთან, კანონიერ წარმომადგენლებთან, მასწავლებლებთან და სკოლის ადმინისტრაციის თანამშრომლებთან საგანმანათლებლო ხასიათის შეხვედრებსაც გამართავენ“, – ამბობს განათლების მინისტრის მოადგილე ეკატერინე დგებუაძე.
ეკა დგებუაძის შეხვედრა სოცმუშაკებთან
„ბათუმელებმა“ კითხვები დასვა ბიუჯეტის და სოციალური მუშაკების ხელფასის შესახებ, თუმცა სამინისტრო ამ დეტალებზე არ საუბრობს. ჯერჯერობით არც ის არის ცნობილი, შერჩეული კანდიდატებიდან ვინ, რომელ რეგიონში გადანაწილდა, როგორი იქნება მათი მუშაობის გრაფიკი და გაწვდება თუ არა ერთი სოციალური მუშაკი გაზრდილ მოთხოვნებს.
როგორც ვიცით, საკმაოდ ბევრია ისეთი ბავშვები, რომლებიც სკოლის მიღმა არიან დარჩენილები ან ნაკლებად არიან ჩართული სასკოლო ცხოვრებაში.
ასევე გაზრდილია მანდატურის სამსახურის ფსიქოლოგიური დახმარების ცენტრში მოსწავლეების მიმართვიანობა. მაგალითად, 2018-19 წლებში ფსიქოლოგთან სამი ათასამდე ბავშვი იყო გადამისამართებული. გაიზარდა თუ არა ეს რიცხვი პანდემიის პირობებში, ჯერჯერობით უცნობია.
განათლების მინისტრის ახალი ბრძანების მიხედვით, ასევე შეიცვალა მოსწავლის სტატუსის შეჩერების ვადები – 90 დღის ნაცვლად, ახლა მოსწავლეებს შესაძლოა სტატუსი შეუჩერდეს თუკი ის 45 დღის განმავლობაში არ გამოცხადდება სკოლაში ან ჩაერთვება ონლაინგაკვეთილებზე.
ამავე დროს, სკოლას და სოციალურ მუშაკს განესაზღვრათ კონკრეტული ვადები, თუ როგორ უნდა იმოქმედონ და რა კონკრეტული ნაბიჯები უნდა გადადგან იმისთვის, რომ დაადგინონ ყველა ის მიზეზი და გარემოება, რის გამოც მოსწავლე ვერ ახერხებდა სასკოლო პროცესში ჩართვას. ასევე, იზრუნოს იმაზე, რომ მოსწავლემ შეძლოს გატარებული ღონისძიებების შემდეგ სკოლაში დაბრუნება.
_________________________________
მთავარი ფოტო: განათლების სამინისტროს მიერ შერჩეული სოცმუშაკები
