Batumelebi | დაპირისპირება რიონის ხეობაში პოლიციასა და აქციის მონაწილეებს შორის დაპირისპირება რიონის ხეობაში პოლიციასა და აქციის მონაწილეებს შორის – Batumelebi
RU | GE  

დაპირისპირება რიონის ხეობაში პოლიციასა და აქციის მონაწილეებს შორის

ნამოხვანისკენ მიმავალ გზაზე, სოფელ გუმათში, აქციის მონაწილეებსა და პოლიციას შორის დაპირისპირებაა. აქციის მონაწილეები „გუმათჰესთან“ მდებარე ბლოკპოსტთან იყვნენ მისულები, ისინი ითხოვდნენ გზის გახსნას, რომ გზა გაეგრძელებინათ სოფელ ნამოხვანისკენ.

აქციაზე ერთ-ერთი ორგანიზატორის, ვარლამ გოლეთიანის გამოსვლის დასრულების შემდეგ პოლიცია ფიზიკური ძალით შეეცადა აქციის მონაწილეები გაეწია უკან, რის შემდეგაც დაიწყო დაპირისპირება.

რამდენიმე მოქალაქე პოლიციამ  ადგილს განარიდა.

ამ დროისათვის [16:00 სთ] ე.წ. ბლოგპოსტთან ერთ მხარეს აქციის მონაწილეები რჩებიან, მეორე მხარეს კი პოლიციას კორდონი აქვს გაკეთებული.

ადგილზე იმყოფება „ბათუმელების“ რეპორტიორი. მისი ინფორმაციით, ნამოხვანში პოლიციის დამატებითი ძალა ჩავიდა.

რამდენიმე წუთის წინ ვარლამ გოლეთიანმა მოუწოდა აქციის მონაწილეებს „არ აჰყვნენ პროვოკაციას“.

აქციის მონაწილეები აცხადებენ, რომ მათი პროტესტი მშვიდობიანია იმდენად, რომ დარბევასაც კი ხელებაწეული შეხვდებიან.

ნამოხვანში, ის ტერიტორია, სადაც ადგილობრივებს გუშინდელ დღემდე კარვები ჰქონდათ გაშლილი, მოხნულია. ამის ამსახველი კადრები სოციალურ ქსელში ადგილობრივმა აქტივისტმა, ნუგზარ გოდოლაძემ გაავრცელა. მისი თქმით, ტერიტორია პოლიციამ მოხნა.

ნეტგაზეთის მასალების სხვა გამოცემებში გადაბეჭდვის წესი
ავტორი