საგანმანათლებლო და სამეცნიერო ინფრასტრუქტურის განვითარების სააგენტო თითქმის ერთი თვეა იკვლევს ბაზარს მოსწავლეებისთვის გადასაცემი მედლების შესასყიდი ფასის დასადგენად. მედლები არ მიუღიათ 2019 და 2020 წლის კურსდამთავრებულებს, ასევე მედლის გარეშე დარჩენილია 3 მედალოსანი, რომლებმაც საჯარო სკოლა 2018 წელს დაამთავრეს.
სააგენტოს მონაცემებით, სულ შესასყიდია 8 735 მოოქროვილი და მოვერცხლილი მედლები და ამდენივე მედლების ჩასადები კოლოფები. აქედან 6 622 მოოქროვილი, ხოლო 2 113 მოვერცხლილი მედალი უნდა იყოს.
მედლების მიწოდების ვადა ხელშეკრულების გაფორმებიდან 45 სამუშაო დღეა, თუმცა ჯერ უცნობია ვისთან და როგორ გაფორმდება ხელშეკრულება.
ამასთან, ფასთა კვლევის ეტაპზე მედლების მიწოდების ვადასთან დაკავშირებით შენიშვნის არსებობის შემთხვევაში, დაინტერესებულ პირებს შეუძლიათ მიუთითონ მათთვის სასურველი მიწოდების ვადა.
დაინტერესებულმა პირებმა კი, საგანმანათლებლო და სამეცნიერო ინფრასტრუქტურის განვითარების სააგენტოს, თავიანთი წინადადებები 2021 წლის 14 აპრილის ჩათვლით უნდა წარუდგინონ.
სააგენტოში „ბათუმელებს“ უთხრეს, რომ ფასთა კვლევის დასრულების შემდეგ მედლების შესყიდვაზე გამოცხადდება ტენდერი, სადაც დაზუსტებული იქნება ფასი და მიწოდების ვადა. რაც შეეხება 2018 წელს უმედლოდ დარჩენილებს, სააგენტოს ინფორმაციით, მათ მედლები გასაჩივრების შემდეგ სპეციალურმა კომისიამ მიანიჭა [2 ოქრო, 1 ვერცხლი].
ამავე თემაზე:
ოქროსა და ვერცხლის მედლები მოსწავლეებმა შესაძლოა ვერც წელს მიიღონ
