დღეიდან, 12 აპრილიდან, საქართველოს მოქალაქეების ისრაელში ლეგალურ დასაქმებაზე რეგისტრაცია დაიწყო. რეგისტრაცია შესაძლებელია პორტალზე: workabroad.moh.gov.ge
ისრაელის სახელმწიფოსა და საქართველოს მთავრობების შეთანხმების თანახმად, საქართველოს მოქალაქეები ისრაელის სახელმწიფოში ხანგრძლივი მოვლის დაწესებულებებში დამხმარეს პოზიციაზე დასაქმდებიან.
დასაქმების ხანგრძლივობა 1 წელია, ისრაელში ჩასული დასაქმებული მიიღებს ერთწლიან ვიზას, რომლის მოქმედების ვადის გაგრძელება შესაძლებელია ყოველწლიურად, მაქსიმუმ 5 წლის განმავლობაში.
ჯანდაცვის სამინისტროს განმარტებით, კანდიდატს უნდა ესმოდეს და ეთანხმებოდეს, რომ აუცილებლად უნდა დატოვოს ისრაელი სამუშაო ვიზის ვადის გასვლის შემდეგ. ასევე, უნდა აცნობიერებდეს, რომ იგი ვერ შეძლებს მომავალში ისრაელში მუშაობას.
2021 წლის განმავლობაში დაგეგმილია 1000 საქართველოს მოქალაქის დასაქმება ისრაელში.
საქართველოს მოქალაქეები ისრაელში ხანგრძლივი მოვლის საჭიროების მქონე პაციენტებისათვის განკუთვნილ სამკურნალო დაწესებულებებში დასაქმდებიან. მათ ევალებათ ხანდაზმულების/შეზღუდული შესაძლებლობის მქონე პაციენტების მოვლა.
ისრაელში დასაქმებული დამხმარეს ფუნქცია-მოვალეობებია:
• პაციენტის მოვლა და გადაადგილებაში დახმარება;
• პაციენტის ჰიგიენაზე ზრუნვა [მათ შორის, დაბანა, მოწესრიგება, თეთრეულის გამოცვლა]
• პაციენტის კვება/კვებაში დახმარება;
• პაციენტთან კომუნიკაცია;
• პალატის სისუფთავის დაცვა;
• ექთნის ზედამხედველობისა და მითითებების შესაბამისად პაციენტებისათვის საჭირო სხვა დახმარების გაწევა.
დასაქმება გულისხმობს მუშაობას სრული განაკვეთით – კვირაში 6 სამუშაო დღე, 42 საათი კვირაში. შესაძლებელია ზეგანაკვეთური მუშაობა [კვირაში დამატებით 16 საათი ან მეტი], რომელიც ანაზღაურდება გაზრდილი ტარიფით.
ისრაელში დასაქმებას საქართველოს 1000 მოქალაქე შეძლებს – რეგისტრაცია 12 აპრილს დაიწყება
