Batumelebi | სოფელში არ უშვებენ ნამახვანიჰესის პროტესტის ორგანიზატორებს – შსს კარვებს შლის სოფელში არ უშვებენ ნამახვანიჰესის პროტესტის ორგანიზატორებს – შსს კარვებს შლის – Batumelebi
RU | GE  

სოფელში არ უშვებენ ნამახვანიჰესის პროტესტის ორგანიზატორებს – შსს კარვებს შლის

პოლიცია ამ დრომდე არ აძლევს გადაადგილების უფლებას „რიონის ხეობის მცველებს“ – ვარლამ გოლეთიანს და მარიტა მუსელიანს სოფელ ნამოხვანის მიმართულებით. შსს-ს წარმომადგენლებმა ისინი სოფელ გუმათთან გახსნილ სასაზღვრო-გამშვებ პუნქტზე გააჩერეს.

„ფაქტი არის სახეზე, რომ ცდილობენ ბოლომდე გადაუარონ ჩვენს ღირსებას. ამას გვეუბნებიან ამ მოქმედებით. არ აინტერესებთ ჩვენი აზრი. ძალაუფლება აქვთ და ამ ბერკეტს იყენებენ ბოლომდე,“ – თქვა ვარლამ გოლეთიანმა ფეისბუქლაივში, რომელიც „რიონის ხეობის გადარჩენისთვის“ ფეისბუქგვერდზე გადის.

ლაივში ჩანს, თუ როგორ სთხოვს საპროტესტო აქციების ერთ-ერთი ორგანიზატორი, მარიტა მუსელიანი პოლიციელებს მისცენ გადაადგილების უფლება, თუმცა პოლიციელებმა ის სოფელ ნამოხვანში არ გაუშვეს.

„რადგან კარვებს შლით, გამიშვით. ძაღლი მყავს კარავთან. ჩვენ გარდა იმ ძაღლს ვერავინ ვერ ეკარება. გთხოვთ, გაგვიშვით,“ – არაერთგზის სთხოვა პოლიციელებს მარიტა მუსელიანმა.

ნამახვანში საპროტესტო აქციის მონაწილეთა კარვების დაშლაზე განცხადება გააკეთა შინაგან საქმეთა სამინისტრომ.

შსს კარვების დაშლას მდინარე რიონის მოსალოდნელი ადიდებით ხსნის.

 

ნეტგაზეთის მასალების სხვა გამოცემებში გადაბეჭდვის წესი
ავტორი