საბერძნეთში, ქალაქ თესალონიკში მდებარე საქართველოს გენერალური საკონსულოს ცნობით, მიღწეულია შეთანხმება ქალაქის მერთან თესალონიკში საკვირაო სკოლისთვის შენობის გამოყოფასთან დაკავშირებით, სადაც ქართველი ბავშვები შეძლებენ ქართული ენისა და ისტორიის შესწავლას.
შეხვედრა თესალონიკის მერთან, კონსტანტინოს ზერვასთან თესალონიკში საქართველოს გენერალურმა კონსულმა ნოდარ კომახიძემ 11 მარტს გამართა.
„ნოდარ კომახიძემ თხოვნით მიმართა თესალონიკის მერს საკვირაო სკოლისთვის შენობის გამოყოფასთან დაკავშირებით, სადაც ქართველი ბავშვები შეძლებენ ქართული ენისა და ისტორიის შესწავლას. ნოდარ კომახიძემ აღნიშნა, რომ საკვირაო სკოლის არსებობა ხელს შეუწყობს მომავალ თაობაში ეროვნული თვითმყოფადობის შენარჩუნებას.
კონსტანტინოს ზერვასმა საკვირაო სკოლის გახსნასთან დაკავშირებით სრული მხარდაჭერა და თანადგომის სურვილი გამოთქვა და განაცხადა, რომ იგი საკვირაო სკოლისთვის გადმოგვცემს თესალონიკის საჯარო სკოლის შენობას,“ – აღნიშნულია თესალონიკში მდებარე საქართველოს გენერალური საკონსულოს განცხადებაში.
საბერძნეთში, საქართველოს საელჩოს 2013 წლის მონაცემებით, 150 000-ზე მეტი ქართველი ემიგრანტი ცხოვრობს. თესალონიკი ერთ-ერთი ყველაზე პოპულარული ქალაქია საბერძნეთში მცხოვრებ ქართველ ემიგრანტებს შორის.
