Batumelebi | ხულოში კანალიზაციის ახალ გამწმენდ ნაგებობას ააშენებენ ხულოში კანალიზაციის ახალ გამწმენდ ნაგებობას ააშენებენ – Batumelebi
RU | GE  

ხულოში კანალიზაციის ახალ გამწმენდ ნაგებობას ააშენებენ

დაბა ხულოში კანალიზაციის და ჩამდინარე წყლების ახალ გამწმენდ ნაგებობას ააშენებენ. პროგრამა, საქართველო-გერმანიის ფინანსური თანამშომლობის ფარგლებში, ევროკავშირისგან დამატებით დაფინანსებით ხორციელდება.

დაგეგმილი საქმიანობისთვის საჭირო იქნება თუ არა გარემოზე ზემოქმედების შეფასება [გზშ], ეს საქართველოს გარემოს დაცვისა და სოფლის მეურნეობის სამინისტრომ უნდა გადაწყვიტოს. შესაბამისი სკრინინგის განაცხადით სამინისტროს „აჭარის წყლის ალიანსმა“ უკვე მიმართა.

დაბა ხულოში, პროექტის ფარგლებში, იგეგმება მთლიანი საკანალიზაციო ქსელის რეკონსტრუქცია, მოეწყობა წყალარინების ახალი ქსელი. არსებული კანალიზაცია და ჭები კი დაინგრევა ახალი ქსელის მშენებლობის პარალელურად.

მთლიანად დაინგრევა არსებული ჩამდინარე წყლის ნაგებობაც და მის ადგილას ახალი აშენდება, რომელიც გაწმენდს, როგორც ჩამდინარე წყალს, ასევე ფეკალურ ლამს.

„ფეკალური ლამის ახალი გამწმენდი ნაგებობა აშენდება იმავე ადგილზე და კომბინირებული იქნება ახალ ჩამდინარე წყლის გამწმენდ ნაგებობასთან. ის გაწმენს ფეკალურ ლამს, რომელიც წარმოქმნილია ინდივიდუალური სეპტიკური ავზებიდან, საიდანაც ვაკუუმ მანქანებით იქნება გადატანილი გაწმენდის ადგილზე… პროექტით გამწმენთან ერთად მოეწყობა ფეკალური ლამის საშრობი მოედნები. ფეკალური ლამის თხევადი ნაწილი წავა ჩამდინარე წყლის გამწმენდ ნაგებობაში გაწმენდისთვის, ხოლო მყარი ნაწილი გაიყიდება როგორც სასოფლო სამეურნეო სასუქი (გამანოყიერებელი)“, – აღნიშნულია სკრინინგის განაცხადში.

დოკუმენტში ასევე აღნიშნულია, რომ ხულოში საკანალიზაციო ქსელი ამჟამად ცუდ მდგომარეობაშია, არსებული ჩამდინარე წყლის გამწმენდი ნაგებობა კი უფუნქციოა და საკანალიზაციო წყალი პირდაპირ ჩაედინება მდინარე აჭარისწყალში. ახალი გამწმენდი ნაგებობით გაწმენდილი წყალი კი, ევროკავშირის ქვეყნების სტანდარტების შესაბამისი იქნება.

დაგეგმილი საქმიანობის სკრინინგის განცხადებასთან დაკავშირებული წერილობითი შენიშვნები და მოსაზრებები დაინტერესებულ პირებს შეუძლიათ საქართველოს გარემოს დაცვისა და სოფლის მეურნეობის სამინისტროს 2021 წლის 17 მარტის ჩათვლით წარუდგინონ.

აჭარის 40-ზე მეტ სოფელში, ასევე დაბებში: ხულოში, შუახევსა და ქედაში, წყლისა და კანალიზაციის სისტემების მოსაწყობად ჯამში 37 მილიონზე მეტი ევრო დაიხარჯება. სამუშაოების დაწყება 2021 წლის შემოდგომაზე იგეგმება.

ამ თემაზე ვრცლად:

აჭარის სოფლები, სადაც წყლისა და კანალიზაციის სისტემას ააშენებენ – დაიხარჯება 37 მილიონი ევრო

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com