მთავარი,სიახლეები

სასწავლო პროცესი აუდიტორიებში 15 მარტიდან განახლდება

24.02.2021 • 1079
სასწავლო პროცესი აუდიტორიებში 15 მარტიდან განახლდება

პრემიერ-მინისტრის ირაკლი ღარიბაშვილის განცხადებით, აუდიტორიებში სასწავლო პროცესი 15 მარტიდან განახლდება. ხოლო კონფერენცია-ტრენინგები შესაბამისი პროტოკოლის დაცვით განახლდება პირველი მარტიდან.

სხდომის შემდეგ განათლების მინისტრმა მიხეილ ჩხენკელმა დამატებით განმარტა, რომ  პირველი მარტიდან უმაღლეს სასწავლებლებს და კოლეჯებს უფლება ექნებათ კლინიკური, პრაქტიკული, ლაბორატორიული კომპონენტები და გამოცდები არადისტანციურ ფორმატში ჩაატარონ.

„ეს ნებაყოფლობითია. კონკრეტულ გადაწყვეტილებებს ინდივიდუალურად მიიღებენ უმაღლესი სასწავლებლები ჩვენთან შეთანხმებით. შემდგომი ეტაპი ანუ საქმიანობის სრულად აღდგენაა“, – განაცხადა განათლების მინისტრმა, მიხეილ ჩხენკელმა.

შეზღუდვები მოიხსნა სკოლამდელი აღზრდის დაწესებულებებზეც და ისინი, როგორც საჯარო, ასევე კერძო ბაღები, მუშაობას განაახლებენ პირველი მარტიდან, ორ კვირაში ერთხელ თანამშრომელთა 20 პროცენტის სავალდებულო ტესტირების პირობით.

ამასთან, პირველი მარტიდან რეგულაციების სრული დაცვით, საქართველოს მასშტაბით, ამუშავდება მუზეუმები და ბიბლიოთეკები. ასევე, რეგულაციების სრული დაცვით 15 მარტიდან მუშაობას განაახლებენ სკოლებთან არსებული სახელოვნებო და სპორტული წრეები.

რაც შეეხება თეატრებს, პროფესიულ ანსამბლებსა და სპორტულ კლუბებს, აქაც პროცესი 2 ეტაპადაა დაყოფილი, 15 მარტიდან სარეპეტიციო პროცესს განაახლებენ თეატრები და პროფესიული ანსამბლები, ხოლო საწვრთნელ პროცესს – სპორტული კლუბები.

საქმიანობის სრულად აღდგენა, კერძოდ, თეატრალური წარმოდგენების, კონცერტებისა და სპორტული შეჯიბრებების ჩატარება მაყურებლის დასწრებით, დაწესებული რეგულაციების სრული დაცვით, შესაძლებელი იქნება პირველი აპრილიდან.

__________________________________

ამავე თემაზე:

საქალაქთაშორისო ტრანსპორტი 25 თებერვლიდან ამოქმედდება – მთავრობა

გადაბეჭდვის წესი


ასევე: