გუშინ, 12 თებერვალს, ბათუმში 25 წლის მეხანძრე-მაშველი, თორნიკე კიპაროიძე სამსახურეობრივი მოვალეობის შესრულების დროს დაიღუპა.
ოფიციალური ინფორმაციით, იგი გამოძახებაზე იმყოფებოდა და მისი გარდაცვალების მიზეზი სახანძრო კიბიდან გადმოვარდნა გახდა.
„მეხანძრე-მაშველი ხანძრის გამოძახებაზე იმყოფებოდა, რა დროსაც სახანძრო კიბიდან ჩამოვარდა“ – აღნიშნულია პრესრელიზში, რომელიც გუშინ გაავრცელა საგანგებო სიტუაციების მართვის სამსახურმა.
„ბათუმელებს“ სხვადასხვა წყარომ მიაწოდა ინფორმაცია, რომ მეხანძრის გარდაცვალების მიზეზი არა კიბიდან გადმოვარდნა, არამედ დენის დარტყმა გახდა. „ბათუმელების“ ინფორმაციით, მეხანძრე-მაშველები სამხედრო ბაზის ტერიტორიაზე გამოიძახეს, სადაც 25 წლის მეხანძრეს კიბით ელექტროგადამცემ ბოძზე ასვლა დაავალეს. სწორედ ამ დროს მოხდა უბედური შემთხვევა.
საგანგებო სიტუაციების მართვის სამსახურში ჯერჯერობით არ აზუსტებენ, რა გახდა 25 წლის მეხანძრის დაღუპვის მიზეზი. აქ გვითხრეს, რომ მეხანძრე კიბიდან ნამდვილად ჩამოვარდა, ამ ეტაპზე მიმდინარეობს გამოძიება და მხოლოდ ამის შემდეგ შეეძლებათ თქვან, რა გახდა ახალგაზრდა მეხანძრე-მაშველის სიკვდილის ზუსტი მიზეზი.
ოფიციალური ინფორმაციით, ჩატარდა ექსპერტიზაც, რომლის შედეგები ჯერ არ არის ცნობილი.
საქმეს სამხედრო პოლიცია იძიებს.
___________
ფოტოზე: თორნიკე კიპაროიძე. ფოტო ფეისბუქიდან.
