მთავარი,სიახლეები

ბათუმში 200-მდე მოვაჭრე „უნივერსამში“ სავაჭრო ცენტრის გახსნას ითხოვს | LIVE

01.02.2021 • 1940
ბათუმში 200-მდე მოვაჭრე „უნივერსამში“ სავაჭრო ცენტრის გახსნას ითხოვს | LIVE

დღეს, პირველ თებერვალს, ბათუმში, პუშკინის ქუჩაზე, აქციას მართავენ ყოფილი „უნივერსამის“ შენობაში მდებარე სავაჭრო ცენტრის მოვაჭრეები. ისინი სავაჭრო ცენტრის გახსნას ითხოვენ.

დღეს ბათუმში გაიხსნა მაღაზიები და მოლები, თუმცა არა ბაზრობები. მთავრობის მიერ დაანონსებული შეზღუდვების შემსუბუქების გეგმის თანახმად, სავაჭრო ცენტრების გახსნა 15 თებერვალს იგეგმება, თუმცა მოვაჭრეები ამბობენ, რომ იმ პირობებში, როცა გაიხსნა მაღაზიები, მოლები, სკოლები, სავაჭრო ცენტრების მუშაობის აკრძალვა უსამართლოა. მით უმეტეს, როცა მოვაჭრეებს თვეებია არ უმუშავიათ და უწევთ ბანკის ვალების გადახდა და ოჯახების რჩენა.

„უნივერსამის“ მოვაჭრეებს არც 2020 წლის ბოლოს მისცეს მუშაობის უფლება. სავაჭრო ცენტრი მხოლოდ ერთი დღით იყო გახსნილი, შემდეგ სავაჭრო ობიექტებს შრომის ინსპექციამ დახურვისკენ მოუწოდა, რამაც მოვაჭრეების პროტესტი გამოიწვია.

„ყველაფერი გახსნილია, სკოლა, მაღაზიები გაიხსნა, ტრანსპორტი მუშაობს, ჩვენ რატომ უნდა ვიყოთ დაკეტილი?“ – აცხადებენ მოვაჭრეები.

ისინი აცხადებენ, რომ ხელისუფლების მიდგომა შერჩევითია, რადგან სხვა სავაჭრო ცენტრებში მოვაჭრეებს ეძლევათ მუშაობის საშუალება.

ყოფილი „უნივერსამის“ შენობაში 200-მდე ადამიანი ვაჭრობს სხვადასხვა საქონლით.

მოვაჭრეებმა ისაუბრეს ბათუმის ქუჩის გადაკეტვაზეც, თუმცა ამ განცხადებიდან მალევე ადგილზე პოლიცია გამოჩნდა. გადაწყდა, რომ დღეს, 16 საათზე მოვაჭრეებს შრომის ინსპექციის წარმომადგენლები შეხვდებიან.

გადაბეჭდვის წესი


ასევე: