Batumelebi | „სამსახურიდან პოლიტიკური ნიშნით გამათავისუფლეს“ – ავტობუსების კონტროლიორი „სამსახურიდან პოლიტიკური ნიშნით გამათავისუფლეს“ – ავტობუსების კონტროლიორი – Batumelebi
RU | GE  

„სამსახურიდან პოლიტიკური ნიშნით გამათავისუფლეს“ – ავტობუსების კონტროლიორი

ბათუმის მუნიციპალური ინსპექციის თანამშრომელი ლელა ჩხაიძე ამბობს, რომ სამსახურიდან პოლიტიკური ნიშნით დაითხოვეს, მას შემდეგ, რაც ის აჭარის მთავრობის სახლის წინ, ე.წ. თავისუფლების კვარტალში საპროტესტო აქციებზე დააფიქსირეს.

ლელა ჩხაიძე არ მალავს, რომ ის „ნაციონალური მოძრაობის“ მხარდამჭერია. „მაგრამ ვერავინ დამიმტკიცებს, რომ სამუშაო საათებში ვიყავი აქციაზე“, – ამბობს ის.

ლელას თქმით, ის 31 დეკემბერს გაუთავისუფლებიათ, თუმცა მან ამის შესახებ გუშინ, 25 იანვარს გაიგო: „არ ვიცოდი, რადგან ბრძანება არ ჩამბარებია, შემდეგ დასვენებები გვქონდა და გუშინ გავიგე“.

ლელა ჩხაიძის თქმით, ინსპექციაში განუმარტეს, რომ გათავისუფლება პანდემიას უკავშირდება: „ხელფასებს ვეღარ ვარიგებთო“.

ლელა ჩხაიძე ამბობს, რომ მარტოხელაა და უსამსახუროდ ცხოვრება ძალიან გაუჭირდება.

მუნიციპალურ ინსპექციაში გადასვლამდე ლელა ჩხაიძე „ბათუმის ავტოტრანსპორტში“ კონტროლიორის პოზიციაზე მუშაობდა, იანვრიდან კი ეს ფუნქცია ბათუმის მერიის მუნიციპალურმა ინსპექციამ შეითავსა. შესაბამისად, ლელაც სამუშაოდ ამ ინსპექციაში გადაიყვანეს.

მუნიციპალური ინსპექციიდან ამ საკითხზე განმარტებას ველოდებით და მისი მიღებისთანავე ინფორმაციას განვაახლებთ.

ნეტგაზეთის მასალების სხვა გამოცემებში გადაბეჭდვის წესი
ავტორი