ბათუმში 27 დღის ახალშობილი კორონავირუსისგან განიკურნა.
ბათუმის იაშვილის სახელობის ჰოსპიტლის ინფორმაციით, ახალშობილი საავადმყოფოში მძიმე მდგომარეობაში შეიყვანეს – ჩვილის მდგომარეობის სიმძიმეს ცხელება, ჰიპოდინამია (მოძრაობის უნარის დაქვეითება), ზოგადი დათრგუნვის სიმპტომატიკა, პერიოდული ჭირვეულობა, საკვების ცუდად მიღება განაპირობებდა, “მაგრამ ჩვილი და ექიმები ვირუსთან ბრძოლაში საოცარ შეუპოვრობას იჩენდნენ და საბოლოოდ გაიმარჯვეს კიდეც,” – წერს ჰოსპიტალი.
23 დეკემბრის მონაცემებით, აჭარაში კორონავირუსის 139 ახალი შემთხვევა დაფიქსირდა. ბოლო 24 საათში რეგიონში 291 პაციენტი გამოჯანმრთელდა.
დღეის მონაცემებით, აჭარის კოვიდკლინიკებში მკურნალობს 629 პაციენტი, კოვიდსასტუმროში იმყოფება 673 ადამიანი.