Batumelebi | ბათუმში მკვლელობის მცდელობისთვის 2 პირს 16-16 წელი პატიმრობა მიუსაჯეს ბათუმში მკვლელობის მცდელობისთვის 2 პირს 16-16 წელი პატიმრობა მიუსაჯეს – Batumelebi
RU | GE  

ბათუმში მკვლელობის მცდელობისთვის 2 პირს 16-16 წელი პატიმრობა მიუსაჯეს

ბათუმში ორი პირის განზრახ მკვლელობის მცდელობის საქმეზე ბათუმის საქალაქო სასამართლომ 16 – 16 წლით თავისუფლების აღკვეთა შეუფარდა ბრალდებულებს ა.ქ.-ს და ო.ქ.-ს. ისინი თურქეთის მოქალაქეები არიან.

საუბარია 31 იანვარს ბათუმში მომხდარ შემთხვევაზე. მთავარი პროკურატურის ინფორმაციით, ო.ქ-მ და ა.ქ-მ უკანონოდ გადმოკვეთეს საქართველოს სახელმწიფო საზღვარი ორი პირის – ბ.ა-ს და მ.ა-ს განზრახ მოკვლის მიზნით.

საქმის მასალების მიხედვით, ბრალდებულებმა რამდენჯერმე ესროლეს ბ. ა.-ს, რომელიც ამ დროს ავტომანქანაში იჯდა, რის შედეგადაც სხვა პირის, მ. ა.-ს ჯანმრთელობა დაზიანდა.

„ბრალდებულებმა დანაშაულის სისრულეში მოყვანა ვერ შეძლეს, რადგან დაზარალებულებმა ავტომანქანით მოახერხეს გაქცევა, ხოლო  ო.ქ. და ა.ქ. შემთხვევის ადგილიდან მიიმალნენ…. სამართალდამცველებმა მიმალვაში მყოფი ა.ქ. და ო.ქ. 2020 წლის 03 თებერვალს ბათუმში დააკავეს,“ – აღნიშნულია მთავარი პროკურატურის მიერ გავრცელებულ ინფორმაციაში.

ბრალდებულებს პროკურატურა ჯგუფურად, ორი პირის განზრახ მკვლელობის მცდელობას, ცეცხლსასროლი იარაღისა და საბრძოლო მასალის მართლსაწინააღმდეგო შეძენას, შენახვას, ტარებას, საქართველოს სახელმწიფო საზღვრის უკანონოდ გადმოკვეთასა და სხვისი ნივთის დაზიანებას ედავებოდა.

ბათუმის საქალაქო სასამართლომ ა.ქ. და ო.ქ. სრულად ცნო დამნაშავედ წარდგენილ ბრალდებებში და სასჯელის სახედ და ზომად თითოეულს 16-16 წლით  თავისუფლების აღკვეთა განუსაზღვრა.​

ნეტგაზეთის მასალების სხვა გამოცემებში გადაბეჭდვის წესი
ავტორი