Batumelebi | ხულოს სოფელ ბეღლეთში მდებარე ხიდს ძეგლის სტატუსი მიენიჭა ხულოს სოფელ ბეღლეთში მდებარე ხიდს ძეგლის სტატუსი მიენიჭა – Batumelebi
RU | GE  

ხულოს სოფელ ბეღლეთში მდებარე ხიდს ძეგლის სტატუსი მიენიჭა

ხულოს მუნიციპალიტეტის სოფელ ბეღლეთში მდებარე ხიდს კულტურული მემკვიდრეობის უძრავი ძეგლის სტატუსი მიენიჭა.

შესაბამის ბრძანებას ხელი საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა 2020 წლის 12 ოქტომბერს მოაწერა.

ბრძანება, რომლითაც ძეგლის სტატუსი ქვეყნის სხვადასხვა რეგიონში მდებარე კიდევ 11 ობიექტს [მათ შორის ბორჯომის რკინიგზის სადგურს] მიენიჭა, 16 ოქტომბრიდან შევიდა ძალაში.

ბეღლეთის ხიდის აგების თარიღად ბრძანების დანართში XII საუკუნეა მითითებული.

ისტორიკოსი შოთა მამულაძე „ბათუმელებთან“ საუბარში ამბობს, რომ ბეღლეთის და სხვა თაღოვანი ხიდები აჭარაში, გაცილებით ადრე, IX-X საუკუნეებშია აგებული.

„ამას ადასტურებს, როგორც ქართული, ასევე უცხოური წერილობითი წყაროები. ეს თაღოვანი ხიდები IX-X საუკუნეებში ძირითადად შენდება სამხრეთ საქართველოს ტერიტორიაზე, როცა ისტორიული არტანუჯი გახდა ერთ-ერთი მნიშვნელოვანი ცენტრი ახლო აღმოსავლეთში. ბიზანტიის იმპერატორიც კი აღნიშნავდა, რომ არტანუჯი არის დიდი ქალაქი, სადაც გზები მოდის სირიიდან, არმენიიდან, იბერიიდან, აფხაზეთიდან და აქვს უზარმაზარი შემოსავლები… რომ დავაკვირდეთ, ეს ხიდები აგებულია სწორედ იმ გზებზე, რომლებიც მიდის არტანუჯისკენ. მათ შორის აჭარაში 35-მდე ასეთი ხიდია ფიქსირებული. აქედან 13-მდე ხიდია მოღწეული დღემდე, ერთ-ერთია სწორედ ბეღლეთის ხიდი. ამ ხიდების მშენებლობა უკავშირდება სწორედ IX-X საუკუნეებს და ამ პერიოდში არტანუჯი წარმოადგენდა სამხრეთ დასავლეთ საქართველოს, მათ შორის აჭარის პოლიტიკურ ცენტრსაც“ – ამბობს შოთა მამულაძე.

მისივე თქმით, ბეღლეთის ხიდზე გაჩნდა თანამედროვე ელემენტებიც, თუმცა, ისტორიული ძველი ხიდი მაინც კარგად არის შემონახული. ხიდი სოფლის გზაზე მდებარეობს და ის დღესაც მოქმედია.

ბეღლეთი ხულოდან 13 კილომეტრში, ზღვის დონიდან 1120 მეტრ სიმაღლეზე მდებარეობს. ამავე სოფელშია ბეღლეთის ჯამე, რომელსაც 2006 წლიდან ეროვნული მნიშვნელობის კატეგორიის კულტურის უძრავი ძეგლის სტატუსი აქვს.

თაღოვანი ხიდი სოფელ ბეღლეთში / ფოტო: კულტურული მემკვიდრეობის სააგენტო

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com