Batumelebi | სააკაშვილის მიმართვა ეკრანიდან და ოპოზიციის ხალხმრავალი აქცია ბათუმში სააკაშვილის მიმართვა ეკრანიდან და ოპოზიციის ხალხმრავალი აქცია ბათუმში – Batumelebi
RU | GE  

სააკაშვილის მიმართვა ეკრანიდან და ოპოზიციის ხალხმრავალი აქცია ბათუმში

16 ოქტომბერს, ბათუმის ბულვარში გაერთიანებულმა ოპოზიციამ ხალხმრავალ აქციაზე 2020 წლის არჩევნებზე მაჟორიტარობის კანდიდატები კიდევ ერთხელ წარადგინა.

„31 ოქტომბერს ჩვენ ერთად გავიმარჯვებთ“ – მიმართა გიორგი კირთაძემ, ბათუმის მაჟორიტარობის კანდიდატმა აჭარის უმაღლეს საბჭოში, აქციაზე შეკრებილ მოქალაქეებს და კიდევ ერთხელ ჩამოთვალა გაერთიანებული ოპოზიციის კანდიდატები:

  • ლევან ვარშალომიძე – საქართველოს პარლამენტში
  • გიორგი კირთაძე – აჭარის უმაღლეს საბჭოში
  • გია აბულაძე – ხელვაჩაურის, ხულოს, ქედისა და შუახევის მაჟორიტარობის კანდიდატი აჭარის უმაღლეს საბჭოში
  • მიშა ბოლქვაძე – ხელვაჩაურის, ხულოს, ქედისა და შუახევის მაჟორიტარობის კანდიდატი საქართველოს პარლამენტში
  • ბონდო თედორაძე – ქობულეთის მაჟორიტარობის კანდიდატი საქართველოს პარლამენტში
  • ელგუჯა ბაგრატიონი – ქობულეთის მაჟორიტარობის კანდიდატი და სიის პირველი ნომერი უმაღლეს საბჭოში

აქციაზე გამოვიდა მურმან დუმბაძე, რომელმაც 2004 წლის მაისი, ასლან აბაშიძის წასვლის პერიოდი გაიხსენა და ივანიშვილს მიმართა:

„არაფერი შეგეშალოს, ამის ნახევარმა ხალხმა გააგდო ასლან აბაშიძე. …საქართველოს მოქალაქე ითხოვს ცვლილებას და ეს ცვლილება არის გარდაუვალი. უმორჩილესი თხოვნაა საქართველოს მოქალაქის მიმართ, არ გავაჩეროთ ხელისუფლებაში 8 წელზე მეტად არც ერთი ხელისუფლება“, – განაცხადა მურმან დუმბაძემ.

აქცია ბათუმში

აქციაზე შეკრებილ მოქალაქეებს მიმართა რესპუბლიკური პარტიის ხელმძღვანელმა, ხათუნა სამნიძემ, რომელის გაერთიანებული ოპოზიციის სიის მეათე ნომერია და გრიგოლ ვაშაძემ,  „ნაციონალური მოძრაობამ“- „ძალა ერთობაშია“ სიის მეორე ნომერმა, თუმცა აქციის კულმინაცია დიდ მონიტორზე მიხეილ სააკაშვილის გამოჩენა იყო, რომელმაც უკრაინიდან მიმართა ბათუმის ბულვარში შეკრებილ მხარდამჭერებს.

„ვერ წარმოიდგენთ, როგორ მადგება ცრემლები, როდესაც გიყურებთ. …მე შემოვლილი მაქვს მთელი შავი ზღვისპირეთი, მე ვმართავდი შავიზღისპირეთის მეორე მხარეს, ოდესის ოლქს და ზუსტად ვიცი, არაფერი არ არის ბათუმის ტოლი, არავის არ გაუკეთებია ასეთი დიდი აღმშენებლობა, ასეთი წარმატებისთვის არავის მიუღწევია, როგორსაც ჩვენ მივაღწიეთ იმ რამდენიმე ისტორიულ წელიწადში.

ბრძოლის დამთავრება არის სულ ახლოს, გამარჯვება არის სულ ახლოს, ერთი ხელის გაწვდენაზე. ცოტა კიდევ მოთმინება, ცოტა კიდევ მიწოლა, ცოტა კიდე გაძლება, ცოტა კიდე მეტი ერთიანობა და სულ რამდენიმე დღეში საქართველო გათავისუფლდება ამ კოშმარისგან, ტყუილის კოშკები დაინგრევა“, – განაცხადა მიხეილ სააკაშვილმა.

მიხეილ სააკაშვილი კორონავირუსის თემასაც შეეხო:

„მინდა გითხრათ შემდეგი, ჩემო მეგობრებო, ჩვენ გვაქვს დიდი გამოწვევები, ჩვენ გვემუქრება ძალიან მძიმე დაავადება, რომელიც აბსოლუტურად ხელოვნურად გაავრცელეს ბათუმში, როდესაც შემოიყვანეს ყველაზე დაავადებული ქვეყნიდან, ხელოვნურად, დიდი რაოდენობით, ეგრეთ წოდებული დამსვენებლები.

…მე გპირდებით, რომ მომავალში ვერც ერთი დაავადება ვეღარ მოგვერევა და ვეღარ შემოგვეჩვევა ისე, როგორც შემოგვეჩვია და შემოგვეპარა ბოლო დღეებში ეს კოვიდი, იმ უბედურების გამო, იმის გამო, რომ აბსოლუტურად ხელოვნურად კეთდება, იმისათვის, რომ ხალხი არ წავიდეს არჩევნებზე“, – განაცხადა მიხეილ სააკაშვილმა.

აქცია ბათუმში

მისი მიმართვის დროს ბათუმის ბულვარში პერიოდულად ისმოდა მოქალაქეების ხმა – „მიშა! მიშა!“

გაერთიანებული ოპოზიციის აქცია ბათუმის ბულვარში მიხეილ სააკაშვილის გამოსვლის შემდეგად გაგრძელდა და  დროშების ფრიალით დასრულდა.

ამავე თემაზე: 

ხალხმრავალი აქცია ბათუმში პირბადეების გარეშე

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com