დღეს, 16 ოქტომბერს, ბათუმში გაერთიანებული ოპოზიციის აქცია გაიმართა. ხალხმრავალ აქციაზე, რომელიც ბათუმის ბულვარში შედგა, აქციას მოქალაქეები ძირითადად პირბადეების გარეშე ესწრებოდნენ.
აქციაზე გაერთიანებულმა ოპოზიციამ აჭარაში მაჟორიტარობის კანდიდატები კიდევ ერთხელ წარადგინა: ლევან ვარშალომიძე – საქართველოს პარლამენტში, გიორგი კირთაძე – აჭარის უმაღლეს საბჭოში, გია აბულაძე – ხელვაჩაურის, ხულოს, ქედისა და შუახევის მაჟორიტარობის კანდიდატი აჭარის უმაღლეს საბჭოში და ამავე მუნიციპალიტეტების მაჟორიტარი საქართველოს პარლამენტში – მიშა ბოლქვაძე, ქობულეთის მაჟორიტარობის კანდიდატი საქართველოს პარლამენტში – ბონდო თედორაძე და აჭარის უმაღლეს საბჭოში სიის პირველი ნომერი და მაჟორიტარობის კანდიდატი – ელგუჯა ბაგრატიონი.
აქციაზე დღეს არ იმყოფებოდა გაერთიანებული ოპოზიციის მაჟორიტარობის კანდიდატი ბათუმში, ლევან ვარშალომიძე, მამის, გურამ ვარშალომიძის გარდაცვალების გამო. ლევან ვარშალომიძის მამა დღეს კორონავირუსით გარდაიცვალა.
სექტემბრიდან დღემდე ბათუმი საქართველოს კოვიდრუკაზე ყველაზე ცხელი წერტილია. ქალაქში ყოველ დღე კოვიდის ასობით ახალი შემთხვევა ვლინდება. 16 ოქტომბრის მონაცემებით, აჭარაში კორონავირუსის 342 ახალი შემთხვევა გამოვლინდა, გადატვირთულია კოვიდკლინიკები, ათასზე მეტი ადამიანი სახლში მკურნალობს კორონავირუსის დიაგნოზით.
