„ჩვენი მოთხოვნები არ შეცვლილა, ყველანაირი ლიმიტი ამოწურულია. არანაირი ნაბიჯი ჩვენი პრობლემის მოსაგვარებლად, არ გადადგმულა. ჩვენ ვიწყებთ შიმშილობას,“ – ამბობს ქეთი ქუთათელაძე. ის ერთ-ერთია მათ შორის, ვინც პანდემიის პირობებში უმუშევარი დარჩა. უმუშევრად დარჩენილებმა დღეს, 16 ოქტომბერს, საპროტესტო აქცია განაახლეს.
ქეთი ქუთათელაძის თქმით, შიმშილობას რვა ადამიანი იწყებს, ხოლო მათგან ერთი – გიორგი გორგილაძე აჭარის მთავრობის სახლთან მეხუთე დღეა, რაც შიმშილობს. უმუშევრად დარჩენილები ამბობენ, რომ ისინი აღარ დაიშლებიან, ვიდრე ხელისუფლება გადაწყვეტილებას არ მიიღებს.
უმუშევრად დარჩენილებმა საპროტესტო აქცია გასულ კვირას, 6 ოქტომბერს დაიწყეს. საპროტესტო აქციის მონაწილეები ითხოვდნენ: საბანკო სესხების გადავადებას, ტრანსპორტის მოძრაობის აღდგენას, უმუშევრობის კომპენსაციის შენარჩუნებას და, ასევე, უმუშევრობის კომპენსაციის ოდენობის გაზრდას. ოქტომბერი ბოლო თვეა, როცა ეს ადამიანები კომპენსაციას მიიღებენ.
გასულ კვირას აქციის მონაწილეებს აჭარის მთავრობის თავმჯდომარე დაჰპირდა, რომ მათ პრობლემებს ინდივიდუალურად კვირის ბოლომდე შეისწავლიდნენ.
დღეს აჭარის მთავრობის პრესცენტრში ვერ გვითხრეს, დაკმაყოფილდება თუ არა ამ ეტაპზე აქციის მონაწილეების რომელიმე მოთხოვნა.
![ვის [არ] შეხვდა ზურაბ პატარაძე აჭარაში „ოცნების“ მთავრობის თავმჯდომარედ დაბრუნების შემდეგ](https://batumelebi.netgazeti.ge/wp-content/uploads/2026/06/pataradze-kaveri.jpg)
