„ხვალიდან აჭარის მთავრობის სახლთან მდუმარე საპროტესტო აქციას ვიწყებთ, სათქმელი არაფერია,“ – ამბობს ქეთი ქუთათელაძე. ის ერთ-ერთია მათ შორის, ვინც პანდემიის დროს უმუშევარი დარჩა. უკვე მეოთხე დღეა აჭარის მთავრობის სახლთან ასევე უმუშევრად დარჩენილი გიორგი გორგილაძე შიმშილობს. მისი ჯანმრთელობის მდგომარეობა დამაკმაყოფილებელია.
უმუშევრად დარჩენილები ამბობენ, რომ ხვალ ისინი აღარ დაიშლებიან, ვიდრე საბოლოო პასუხს არ მიიღებენ.
უმუშევრად დარჩენილებმა საპროტესტო აქცია გასულ კვირას, 6 ოქტომბერს დაიწყეს. საპროტესტო აქციის მონაწილეები ითხოვდნენ: საბანკო სესხების გადავადებას, ტრანსპორტის მოძრაობის აღდგენას, უმუშევრობის კომპენსაციის შენარჩუნებას და, ასევე, უმუშევრობის კომპენსაციის ოდენობის გაზრდას. ოქტომბერი ბოლო თვეა, როცა ეს ადამიანები კომპენსაციას მიიღებენ.
გასულ კვირას აქციის მონაწილეებს აჭარის მთავრობის თავმჯდომარე დაჰპირდა, რომ მათ პრობლემებს ინდივიდუალურად კვირის ბოლომდე შეისწავლიდნენ.
